Սաուդյան Արաբիայի Ջիդա քաղաքում օգոստոսի 12-ին կկայանա արաբական պետությունների արտգործնախարարների արտակարգ խորհրդակցություն: Այդ մասին հաղորդել է Արաբական պետությունների լիգայի (ԱՊԼ) գլխավոր քարտուղարի տեղակալ Ահմեդ Բեն Հիլին:
Քննարկման է դրվելու Սիրիայի ներկա իրավիճակի հարցը եւ Քոֆի Անանի հրաժարականից հետո այդ երկրի շուրջ ստեղծված քաղաքական իրավիճակը:
Արաբական երկրների նախարարների խորհրդակցությանը կմասնակցի ԱՊԼ-ի գլխավոր քարտուղար Նաբիլ ալ Արաբին, հայտնում է «Ռոսբալտը»:
Նշենք, որ ավելի վաղ տեղեկություն էր հայտնվել, որ սիրիական ճգնաժամի կայունացման հարցով ՄԱԿ-ի հատուկ ներկայացուցիչ Քոֆի Անանին կարող է փոխարինել ալժիրցի 78-ամյա դիվանագետ Լահդար Բրահիմին: Նրա թեկնածության առումով վերջնական որոշում դեռեւս չի կայացվել, ընդ որում` կազմակերպության շրջանակներում նրա հնարավորությունները բարձր են գնահատվում: