«Հանրակրթական ուսումնական հաստատություններում առաջին կիսամյակի գնահատականները կամփոփվեն մինչեւ հունվար ամսվա ավարտը»,- հունվարի 12-ին լրագրողների հետ զրույցում հայտնեց Կրթության եւ գիտության նախարարության հանրակրթության վարչության պետ Նարինե Հովհաննիսյանը: Ինչ վերաբերվում է «խոզագրիպի» պատճառով հարկադիր պարապուրդի դասաժամերին, ապա ուսուցիչները դրանց համար կվարձատրվեն, իսկ բաց թողնված դասաժամերը կլրացվեն մինչեւ մարտի վերջը: Տիկին Հովհաննիսյանի հավաստմամբ 8-րդ ժամ այլեւս չի լինելու, իսկ 7-րդ ժամ կլինի որոշ դասարաններում:
Առաջին դասարանցիների համար գարնանային արձակուրդ է սահմանվել մարտի 22-ից 28-ը: Երկրորդ դասարանցիների համար նախատեսված գարնանային արձակուրդների օրերը օգտագործվելու են` դեկտեմբերի 8-28-ը ներառյալ կրթական գործընթացի դադարեցման պատճառով բաց թողնված դասաժամերը լրացնելու համար: 3-11-րդ դասարանցիների համար նախատեսված գարնանային արձակուրդների օրերը կօգտագործվեն բաց թողնված դասաժամերը մասամբ լրացնելու համար: 3-11-րդ դասարաններում բաց թողնված դասաժամերի մնացած մասը լրացվելու են հետևյալ կերպ. 5-օրյա ուսումնական շաբաթով աշխատող հանրակրթական ուսումնական հաստատությունները շարժական դասացուցակով կաշխատեն նաև շաբաթ օրերին: 6-օրյա ուսումնական շաբաթով աշխատող հանրակրթական ուսումնական հաստատությունները գործող դասացուցակում կավելացնեն լրացուցիչ ժամեր:
Ինչ վերաբերվում է մանկապարտեզներին, ապա դրանք ջեռուցման պատճառով կվերաբացվեն փետրվարի 1-ին: