«ԵԱՀԿ Մինսկի խմբի գործունեությունը վերջին տարիներին ձախողվել է»,- այսօր լրագրողների հետ հանդիպման ժամանակ կարծիք հայտնեց Ռազմավարական եւ ազգային հետազոտությունների հայկական կենտրոնի ղեկավար Ռիչարդ Կիրակոսյանը, նշելով, որ այդ ձախողումն ունի երկու պատճառ. Մեկն այն է, որ բանակցություններն ընթանում են Հայաստանի ու Ադրբեջանի միջեւ, որին չի մասնակցում Ղարաբաղը, եւ երկրորդ պատճառը բանակցությունների գաղտնիությունն է: Ռ. Կիրակոսյանի համոզմամբ, բանակցային գործընթացում պետք է ներգրավել նաեւ հասարակություններին, քանի որ տեղեկատվության բացն այդ ոլորտում տանում է ապատեղեկատվության:
Հարցին, թե մադրիդյան սկզբունքներն ավելի շատ համահունչ են հայկակա՞ն շահերին, թե` ադրբեջանական եւ ով է լինելու շահողը, եթե դրանք ընդունվեն, վերլուծաբանը պատասխանեց, որ կան կետեր, որոնք լավ են Հայաստանի համար, եւ կան կետեր, որոնք լավ են Ադրբեջանի համար: «Բայց ինձ ավելի շատ անհանգստացնում է այն, որ Հայաստանը չի կարողանում բանակցություններում հանդես գալ որպես ուժեղ կողմ: Իրական թեստը բանակցությունների ընթացքում է: Անհանգստացած եմ, որ Հայաստանն ավելի թույլ է եւ ամենակարեւորը, որ թույլ է ընկալվում դրսում: Սա ամենալուրջ վտանգն է»: Նրա խոսքով, Հայաստանի թուլությունը պայյմանավորված է երկու գործոններով. Մեկն այն է, որ իշխանությունը Հայաստանում ավելի քիչ լեգիտիմություն ունի եւ ավելի քիչ պոպուլյար է, եւ երկրորդ. Հասարակությունը պառակտված է, ինչը պայմանավորված է թե տնտեսական, թե ներքին ճգնաժամով:
Ռ. Կիրակոսյանը նաեւ կարծիք հայտնեց, որ իրական մարտահրավերը պետք է սպասել ոչ թե Բաքվից, այլ Ռուսաստանից, որովհետեւ «Ռուսաստանն ավելի մտերմանում է Ադրբեջանի հետ եւ փորձում է ասել ԱՄՆ-ին, որ ինքն ավելի արդար կլինի»: «Ամենամեծ վտանգը բարեկամների դավաճանությունն է եւ Հայաստանը պետք է պատրաստ լինի ցանկացած շրջադարձի»,- իր խոսքն ամփոփեց նա: