Քարիմ մականվամբ կատուն երեք հազար կմ է անցել հեռացած տանտերերին գտնելու համար:
Ushilapychvost.ru-ն հայտնում է, որ Ուզբեկստանի Գուլիստանից մինչեւ Ռուսաստանի Լիսոկ կատվի ճամփորդությունը տեւել է երկու տարի: Նա ի վերջո գտել է իր տերերին:
Կատվի տիրուհի Ռավիլյա Խաիրովան ամուսնու` Լեւ Կոնդրատիեւի եւ որդու` Ռուսլանի հետ երկու տարի առաջ որոշել էին Ռուսաստան մշտական բնակության տեղափոխվել: Նրանք կատվին թողել էին հարեւանուհու մոտ:
Հասնելով Լիսոկ քաղաք` Ռավիլյան անմիջապես հարեւանուհուն է զանգել կատվի մասին տեղեկանալու եւ տխրել է տհաճ լուրն իմանալով. Քարիմը փախել էր իրենց մեկնելու հաջորդ օրը, եւ կատվին ոչ ոք չէր տեսել:
Մի անգամ էլ Ռավիլյան իր կատվին տեսել է շուկայում: «Նա ճանաչեց ինձ եւ արձագանքեց իր անվանը: Ես պարզապես ցնցված էի: Գրկեցի նրան եւ տաքսիով տուն շտապեցի», - պատմել է տիրուհին:
Նա խոստովանել էր, որ կատվին Քարիմ էր անվանել Ուզբեկստանի նախագահ Իսլամ Քարիմովի պատվին: