Լատվիայի ԱԳ նախարարությունը ռուսական էստրադային արտիստներ Օլեգ Գազմանովին, Իոսիֆ Կոբզոնին եւ Վալերիա բեմական կեղծանվամբ հանդես եկող Ալլա Պերֆիլովային ներառել են այն օտարերկրացիների ցուցակում, որոնց մուտք Լատվիա արգելվում է:
Այդ մասին հայտարարությունը հրապարակվել է գերատեսչության կայքում: Հաղորդվում է, որ ռուսական կատարողների մուտքն արգելվել է անորոշ ժամկետով:
«Նշված անձինք իրենց գործողություններով նպաստել են Ուկրաինայի տարածքային ամբողջականության եւ ինքնիշխանության խաթարմանը»,- ընդգծում է Լատվիայի ԱԳՆ-ն:
Հաղորդագրությունում նշվում է, որ նախարար Էդգարս Ռինկեւչսի որոշումն ընդունվել է Ներգաղթի մասին օրենքի 61 հոդվածի 2-րդ մասի հիմքով:
Ամեն դեպքում, Օլեգ Գազմանովի համերգային տնօրեն Դմիտրի Ցարենկոն տեղեկացրել է, որ արտիստը դեռեւս չի փոխել իր ծրագրերը եւ մտադիր է մեկնել Յուրմալա:
«Ոչ ոք առայժմ ոչինչ չեղյալ չի հայտարարել: Ինձ ոչ ոք չի զանգահարել ո՛չ Լատվիայի դեսպանատնից, ո՛չ այլ տեղից: Այդ պատճառով իմ ծրագրերում ոչինչ չի փոխվել: Ես պարզելու եմ, թե ինչպես են տարածվել այդ լուրերը»,- Ցարենկոյի խոսքերն է մեջբերում BBC-ի ռուսական ծառայությունը:
