Վրաստանն անցել է այսպես կոչված «եվրաասոցացման ճանապարհային քարտեզի» (փաստաթուղթ, որը բարեփոխումներ է նախատեսում գործնականում բոլոր ոլորտներում) իրականացմանը: Հիմնականում դա վերաբերում է օրենսդրությունների միասնականացմաը եւ եվրոպական նորմերի ու ինստիտուտների ներդրմանը:
Հատուկ ճեպազրույցի ընթացքում ԱԳՆ հյուպատոսական բաժնի տնօրեն Գեորգի Տաբատաձեն հայտարարել է, որ սեպտեմբերի 1-ից օտարերկրացիները կարող են Վրաստանում գտնվել տարեկան 180-ից գումարային 90 օր: Սա նշանակում է, որ նրանք կարող են որքան ցանկանում են մեկնել այդ երկիր եւ հետ վերադառնալ, սակայն Վրաստանում իրենց լինելու 180 օրյա շրջանում իրենց գումարային օրերի թիվը չպետք է գերազանցի 90-ը: Մոտավորապես նման փորձառություն գոյություն ունի նաեւ «շենգենյան գոտում»
Նոր կարգը վերաբերում է բոլոր օտարերկրացիներին: Տաբատաձեի խոսքով՝ ԵՄ, ինչպես նաեւ Ադրբեջանի, Հայաստանի, Վրաստանի եւ Թուրքիայի քաղաքացիները նախկինի պես կօգտվեն առանց մուտքի արտոնագրի ռեժիմից, սակայն նախկինում 180-օրյա սահմանափակում չի եղել:
Պետք է նշել, որ առանց մուտքի արտոնագրման ռեժիմը վերաբերում է միայն կարճաժամկետ ուղեւորություններին: Ինչ վերաբերում է երկարաժամկետ մուտքի արտոնագրերին, ինչպես նաեւ ուսման եւ աշխատանքի համար վիզաներին, ապա Հայաստանի եւ Ադրբեջանի քաղաքացիները հետայսու նման արտոնագրեր կստանան Երեւանում եւ Բաքվում Վրաստանի հյուպատոսարաններից:
«Կովկասի վեստնիկ»-ի տվյալներով՝ այս նորամուծությունն արդեն դժգոհություն է առաջ բերել հարեւան երկրների կողմից: Բաքուն եւ Երեւանը պնդում են, որ թեեւ նրանք չեն ստորագրել ԵՄ-ի հետ ասոցացման համաձայնագիրը, սակայն նմանատիպ հարցերը պետք է որոշվեն երկկողմ հիմքի վրա՝ հաշվի առնելով փոխհարաբերությունների ողջ համալիրը: Այդուհանդերձ, «ԵՄ ճանապարհային քարտեզը» Թբիլիսիին այլ հնարավորություն չի թողնում, քան ԵՄ-ում գործող նորմերի հստակ հետեւումը: Հակառակ դեպքում, Վրաստանը վտանգում է եվրաասոցացման գլխավոր պարգեւը՝ 2018թ.-ին Շենգենյան գոտու երկրների հետ առանց մուտքի արտոնագրման ռեժիմի ստացումը:
