Վանաձոր-Ալավերդի միջպետական ավտոճանապարհի 26-րդ կմ-ում այսօր՝ օգոստոսի 20-ին, տեղի ունեցած քարաթափումից հետո ճանապարհը մասամբ երթեւեկելի է թեթեւ մարդատար ավտոմեքենաների համար:

Հայաստանի տրանսպորտի եւ կապի նախարարության լրատվական ծառայության տեղեկացմամբ, եթե խոչընդոտներ չառաջանան, ճանապարհն ամբողջությամբ երթեւեկելի կլինի 2 ժամվա ընթացքում: Այս պահին ճանապարհամերձ ժայռերից դեռեւս խոշոր քարեր կան կախված եւ նոր քարաթափման վտանգ կա:

Հիշեցնենք, որ ժամը 18:00-ի սահմաններում հորդառատ անձրեւի հետեւանքով փակվել էր Վանաձոր-Ալավերդի Մ6 միջպետական ավտոճանապարհի երկու հատված՝ 15-րդ եւ 17-րդ կմ հատվածում։

Լոռու մարզում NEWS.am-ի թղթակիցը հաղորդում է, որ 15-րդ կմ-ում քանդվել է ճանապարհի կեսը, երթեւեկությունը դարձել է միակողմանի, եւ եթե ճանապարհը շարունակի քանդվել, լուրջ խնդիրներ կարող են առաջանալ, քանի որ ճանապարհի աջ կողմով անցնում է Նովոսելցովո-Վանաձոր 1000 մմ տրամագծով ջրատարը, որն ապահովում է Վանաձոր քաղաքի խմելու ջրի 60 տոկոսը։ Նշենք, որ այս հատվածում երկու ամիս առաջ նույնպես փլուզում էր տեղի ունեցել, իսկ Տրանսպորտի եւ կապի նախարարությունը վերանորոգման աշխատանքներ էր իրականացրել այդ հատվածում։