ՌԴ արտգործնախարար Սերգեյ Լավրովը մեկնաբանել է Մաքսային միությունից եւ Միասնական տնտեսական տարածքից Ղազախստանի դուրս գալու հնարավորությունը, հաղորդում է Ռուսաստանի ԱԳՆ-ի մամուլի ծառայությունը:
«Ես կարող եմ մեկնաբանել միայն այն, ինչին ականատես եմ եղել: Մինսկում Ռուսաստանի, Բելառուսի, Ղազախստանի եւ Ուկրաինայի նախագահների, Եվրասիական տնտեսական հանձնաժողովի կոլեգիայի նախագահ Վ. Խրիստենկոյի եւ երեք եվրահանձնակատարների համատեղ հանդիպումը նվիրված էր ուկրաինական ճգնաժամից դուրս գալու ուղիների որոնմանը, ինչպես հրադադարի տեսակետից (այս հաշվով Մաքսային միության մասնակից-երկրների դիրքորոշումը կատարելապես միասնական է), այնպես էլ տնտեսական ներդաշնակության ապահովման մասով, ինչպես նաեւ այնպիսի լուծումների որոնմանը, որոնք Ուկրաինային այնպիսի իրավիճակի մեջ չեն դնի, երբ վերջինս, Եվրամիության հետ ինչ-որ փաստաթուղթ ստորագրելով, կխախտի ԱՊՀ-ի ազատ առեւտրի գոտու նկատմամբ իր պարտավորությունները», - հայտարարել է Լավրովը, հաղորդում է «Ինտերֆաքսը»:
Նրա խոսքով՝ Մաքսային միության մասնակիցների միջեւ (Ռուսաստանի, Բելառուսի եւ Ղազախստանի միջեւ) ոչ մի տարաձայնություն չի եղել եւ չի էլ կարող լինել
«Մեր մոտեցումը բացարձակապես միասնական է՝ Մաքսային միությունը ինքնիշխան պետությունների միավորում է, որոնք իրենց տնտեսական, առեւտրային եւ ներդրումային ներուժի միավորման մեջ շահ են տեսնում: Հենց այդ է Մաքսային միության հետ համագործակցել ցանկացող այլ երկրների՝ վերջինիս անդամակցելու, այնուհետեւ Եվրասիական տնտեսական միության անդամ դառնալու ձգողական գործոնը», - նշել է Լավրովը:
Հիշեցնենք, որ օգոստոսի 24-ին Ղազախստանի նախագահը հայտարարել էր, որ «եթե Եվրասիական տնտեսական միությանը անդամակացությունը խոչընդոտի Ղազախստանի ինքնիշխանությանը, ապա հանրապետությունը դուրս կգա միությունից»: