Աբովյանի քաղաքապետարանի նախաձեռնությամբ մեկ տարի առաջ բացված քաղաքային շուկայի վաճառողները դժգոհ են  առեւտրից, իսկ պատճառը օրեցօր ավելացող փողոցային առեւտուրն է:

«Մարդիկ հիմա ճանապարհներին են առեւտուր անում: Բերում, գետնին են լցնում սաղ ապրանքը, հիգիենիան պահպանված չէ, մարդիկ էլ գերադասում են մի տասը, քսան դրամ պակաս տան ու այդտեղից օգտվեն»,- NEWS.am-ի հետ զրույցում ասաց շուկայի վաճառողներից Գեղեցիկ Գրիգորյանը:

Շուկայի աշխատողների խոսքով, փողոցային առեւտրի դեմ քաղաքապետարանի պայքարը արդյունք չի տալիս։ «Փողոցի առեւտուրն ապօրինի է: Քաղաքապետարանից գալիս են, խոսում են, որ չի կարելի, ոտքերը քաշում են, նորից նույն պատմությունն է: Եթե շուկա է, ուրեմն թող մի տեղ լինի»,- բարկացած ասաց Անահիտ Նավասարդյանը:

Փողոցում վաճառող տիկինը, որը չցանկացավ ներկայանալ, նշեց, որ իրենք ստիպված են փողոցում վաճառում, որովհետեւ շուկա ոչ ոք չի գնում.  «Ամբողջ Աբովյան քաղաքն էլ շուկա է: Հիմնական խնդիրը նա է, որ քաղաքային շուկայում առեւտուր չի լինում, եւ մարդիկ որտեղ պատահում է, առեւտուր են անում»:

Շուկայի վաճառողներից մի քանիսն էլ, որոնք հրաժարվեցին խոսել տեսախցիկի առջեւ, ասացին, որ քաղաքապետարանը փողոցային առեւտրի վրա աչք է փակում, որովհետեւ առեւտրականներից «տեղի փող» է վերցնում՝ օրական 200-300 դրամ։

Նշենք, որ Աբովյանի քաղաքային շուկան բացվել է 2013թ. հոկտեմբերին եւ ունի 100 տաղավար: Այսօր տաղավարներից միայն 10-ն է օգտագործվում առեւտրի համար, մյուսները դատարկ են։