![](img/news/22/75/20/default.jpg)
Թուրքիայի նախագահ Ռեջեփ Թայիփ Էրդողանը սեպտեմբերի 5-ի երեկոյան ՆԱՏՕ-ի գագաթնաժողովի շրջանակներում հանդիպել է ԱՄՆ նախագահ Բարաք Օբամայի հետ:
Թուրքական Milliyet-ի փոխանցմամբ՝ Ռեջեփ Թայիփ Էրդողանը 17 ամիս ընդմիջումից հետո կարողացել է դեմ առ դեմ հանդիպում անցկացնել ԱՄՆ նախագահի հետ: Նշվում է, որ հանդիպման ժամանակ քննարկվել են տարածաշրջանային խնդիրները:
Էրդողանը ԱՄՆ նախագահից պահանջել է կամ Թուրքիային հանձնել ԱՄՆ-ում բնակվող Ֆեթուլլահ Գյուլենին կամ նրան արտաքսել երկրից:
Անդրադառնալով Իրաքում տիրող իրավիճակին, Թուրքիայի նախագահը պնդել է, թե սխալ է համարում ԱՄՆ կողմից զենք ուղարկելը Իրաք, քանի որ այն կարող է խանգարել Թուրքիայում ընթացող քրդական հարցի կարգավորմանը եւ կավելացնի լարվածությունը:
Milliyet-ի թղթակիցը գրել է նաեւ, թե Էրդողանը ուշադրության է հրավիրել Իսրայելի նկատմամբ ԱՄՆ-ի կիրառած երկակի ստանդարտներին՝ հիշեցնելով, թե Իսրայելը մինչ այժմ չի կատարել Թուրքիայի հետ հաշտեցման համար անհրաժեշտ երկու պայմանները՝ փոխհատուցում եւ Գազայի հատվածի ապաշրջափակում:
Նշվում է, որ հանդիպումը տեւել է 1 ժամ 25 րոպե: