Տոմսկի Ստրեժեւոյ քաղաքի բնակիչը զոհվել, իսկ նրա կինը ծանր վիրավորվել է արջի հարձակման արդյունքում, «Ինտերֆաքսին» հայտնել է Ալեքսանդրի շրջանի որսագետ Վիկտոր Իվանովը:
«Կիրակի երեկոյան զույգը ավտոմեքենայով գնացել է օդանավակայանի շրջան՝ շան հետ զբոսնելու: Զբոսանքի ժամանակ արջը հարձակվել է, ինչի արդյունքում տղամարդը մահացու վնասվածքներ է ստացել: Գազանը նրան բառացիորեն մաս-մաս է արել: Կինը եւս ծանր վնասվածքներ է ստացել եւ գտնվում է վերակենդանացման բաժանմունքում»,- ասել է Իվանովը:
Ըստ նրա` նույն օրը որսորդները սպանել են արջին եւ նրա լեշը փորձաքննության ուղարկել` հարձակման պատճառը պարզելու համար: Գործակալության զրուցակիցը պարզաբանել է, որ արջն, ամենայն հավանականությամբ, հենց այնպես չի հարձակվել. մինչ այդ նրան կարող էին վիրավորած կամ հրահրած լինել:
Այս տարի հաճախադեպ են դարձել արջերի այցերը բնակավայրեր եւ արդյունաբերական կառույցներ` վայրի բուսականության բերքի սակավության պատճառով: «Արջերը չեն հասցնում քուն մտնելուց առաջ ճարպ կուտակել, նրանք սոված են, օգտվում են ցանկացած հնարավորությունից` սնունդ հայթայթելու համար: Այդ պատճառով էլ բնակչութանը խորհուրդ ենք տալիս խուսափել անտառ այցելելուց», - ընդգծել է Իվանովը:
