ՀՀ կրթության եւ գիտության նախարար Արմեն Աշոտյանն այսօր` սեպտեմբերի 29-ին, ընդունել է ՀՀ-ում Հնդկաստանի դեսպան Սուրեշ Բաբու Թադիպանենիին եւ նրա հետ քնարկել հայ-հնդկական կրթական համագործակցության հարցեր:
ԿԳՆ մամուլի ծառայությունից հայտնում են, որ, մասնավորապես, անդրադարձ է եղել բարձրագույն կրթության ոլորտում ուսանողների փոխանակման ու գիտակրթական ծրագրերին: Այս համատեքստում, նախարարը շեշտել է, որ օտարերկրյա ուսանողների ներգրավումը Հայաստանի կրթական քաղաքականության առաջնահերթություններից է:
Բոլոնիայի գործընթացում Հայաստանի քարտուղարության վերջին զարգացումները ներկայացնելուց հետո ՀՀ ԿԳ նախարար Ա. Աշոտյանն օգտագործելով առիթը, Հնդկաստանի կրթության նախարարին հրավիրել է մասնակցելու 2015 թվականին Երեւանում կայանալիք Բոլոնիայի գործընթացի նախարարական գագաթաժողովին եւ քաղաքական ֆորումին: Դեսպան Սուրեշ Բաբու Թադիպանենին նշել է, որ Հնդկաստանում մեծ հետաքրքրություն կա Հայաստանի բարձրագույն կրթության նկատմամբ: Դեսպանն առաջարկել է Հայաստանի դպրոցականների համար կազմակերպել Հնդկաստանին եւ հնդկական մշակույթին նվիրված շարադրությունների եւ նկարչական աշխատանքների մրցույթ, որի հաղթողները կստանան մրցանակներ, ինչպես նաեւ հնդկական կողմի նախաձեռնությամբ հնարավորություն կունենան այցելել Հնդկաստան:
Հանդիպման ընթացքում անդրադարձ է կատարվել նաեւ ավարտական փաստաթղթերի փոխճանաչման, կրթության եւ գիտության ոլորտում երկու երկրների միջեւ ստորագրվելիք համաձայնագրերին , ինչպես նաեւ երկու երկրների փոխադարձ համագործակցությանը վերաբերող մի շարք այլ հարցերի: