Ռուսաստանը մտադիր է դիտարկել էներգետիկ ընկերությունների խոշոր փաթեթների մասնավորեցման հնարավորությունը: Ըստ «Ինտերֆաքս»-ի, այս մասին Ռուսաստանի նախագահ Վլադիմիր Պուտինը հայտարարել է Մոսկվայում հոկտեմբերի 2-ին կայացած «Ռուսաստանն է կանչում» ներդրումային համաժողովի ժամանակ ունեցած ելույթում:
«Իմ նախընտրական հոդվածներում եւ հետո՝ հրամանագրերում ես ասել եմ, որ մենք զբաղվելու ենք մասնավորեցմամբ, բայց փակագծերից դուրս եմ բերել էներգետիկ ընկերությունները: Իսկ հիմա իրավիճակը փոխվում է, եւ ես վստահ չեմ, որ մենք պետք է պահպանենք այդ դիրքորոշումը»,- ասել է Ռուսաստանի նախագահը:
Պուտինը հավելել է, որ ներկայում իշխանությունները դիտարկում են պետության վերահսկողության ներքո գտնվող էներգետիկ ընկերությունների խոշոր փաթեթներով IPO-ի շուկա դուրս գալու հնարավորությունը:
