Նավթի գների անկումը պայմանավորված է ոչ միայն շուկայական գործոններով, այլեւ մի շարք կարեւոր հանգամանքներով: Այս մասին հաղորդում է «Ուտրո»-ն՝ վկայակոչելով չինական «Ժենմին ժիբաո» հրատարակությանը:
Հոդվածի հեղինակները մատնանշում են, որ 2008 թվականի ճգնաժամից հետո որոշ վերականգնում արձանագրեց միայն ԱՄՆ-ն: Այլ երկրների, առաջին հերթին՝ Եվրոպայի տնտեսությունները նախկինի պես անկման մեջ են: Դրա հետ կապված եվրոպական տնտեսությունների զարգացման միջոց է էներգակիրների գների նվազման միջոցով ծախսերը նվազեցնելը:
Չինական պարբերականի հեղինակների կարծիքով՝ այս պատմության ոչ շուկայական հատվածն աշխարհում տիրող աշխարհաքաղաքական իրավիճակն է: «Իրանը եւ Ռուսաստանն արեւմտյան պետությունների կողմից որպես թշնամի են դիտարկվում, այդ պատճառով Արեւմուտքը, ձեռք բերելով ՕՊԵԿ-ի աջակցությունը, սկսում է այն իր նպատակների համար օգտագործել»,- նշվում է հոդվածում:
ԱՄՆ-ն եւ Սաուդյան Արաբիան, ըստ չինացի վերլուծաբանների, ծրագրում են Ասիայում եւ Հյուսիսային Ամերիկայում նավթը բավական ցածր գնով վաճառել. մեկ բարելը՝ 50-60 դոլար:
Ըստ աղբյուրի, ԱՄՆ-ի եւ Սաուդյան Արաբիայի նավթային դաշինքը, որի նպատակը Ռուսաստանին եւ Իրանին պատժելն ու շուկայից հեռացնելն է, դժվար թե հավերժ տեւի: «Վաղ թե ուշ դաշինքի անդամների շահերը կբախվեն: Ինչ վերաբերում է Ռուսաստանին, ապա սրանով այդ երկրի դեմ ամերիկա-արաբական դավադրությունը կսպառվի: Գների ներկա մակարդակը, ըստ ամենայնի, բյուջեի վերանայում կպահանջի, սակայն անդառնալի տնտեսական հետեւանքների չի հանգեցնի»,- կանխատեսում են չինացիները:
