«Ռուսական երկաթուղիներ» ընկերությունը քննարկում է Աբխազիայի եւ Վրաստանի տարածքով դեպի Հայաստան երկաթգծի բացման հարցը: Այս մասին haqqin.az-ին հայտնել է «Ռուսական երկաթուղիներ» ընկերության ղեկավար Վլադիմիր Յակունինը:
Նրա խոսքով՝ Ռուսաստանը միշտ հանդես է եկել Վրաստան-Աբխազիա երկաթգծի վերագործարկման օգտին, սակայն այդ խնդիրը բացառապես քաղաքական բնույթ ունի:
«Վրաստանի եւ Աբխազիայի միջեւ կուտակված հակասությունները պետք է կարգավորվեն քաղաքական մակարդակում: Ինչ վերաբերում է Ռուսաստանին, ապա այն երկու ձեռքով կողմ է այդ ճանապարհի վերագործարկմանը»,-ասել է Յակունինը:
Նա նաեւ նշել է, որ ապագայում այդ ճանապարհը կարող է միանալ նաեւ Հայաստանին:
«ՌԵՈՒ-ն իր կողմից քննարկում է Աբխազիայի եւ Վրաստանի տարածքով դեպի Հայաստան երկաթուղու գործարկման հարցը: Աբխազիայով երկաթուղային հաղորդակցությունը, որը ընդհանտվել է ավելի քան 20 տարի առաջ, կարեւոր նշանակություն ունի Հայաստանի համար, բայց կրկնեմ, որ այդ հարցը քաղաքական է, ուստի այստեղ պետք է կողմերի քաղաքական կամքը»,-ասել է նա:
