ՀՀ քննչական կոմիտեի ՀԿԳ քննության գլխավոր վարչությունում ավարտվել է առանձնապես խոշոր չափերի թմրամիջոցների ապօրինի շրջանառության դեպքի առթիվ հարուցված քրեական գործի նախաքննությունը, որի շրջանակներում մեղադրանք է առաջադրվել 6 անձի:

ՀՀ քննչական կոմիտեի տեղեկատվության եւ հասարակայնության հետ կապերի բաժնից հայտնում են, թե մինչդատական վարույթում ձեռք բերված ապացույցների համաձայն՝ նախկինում հինգ անգամ դատապարտված Տ.Ղանդիլյանը, «Սեւան» քրեակատարողական հիմնարկում պատիժը կրելիս, իր ազգական Մ.Ղանդիլյանի օժանդակությամբ Ֆրանսիայում բնակվող Ա.Նազարյանից 2013 թվականի նոյեմբերի սկզբներին, իրացնելու նպատակով, ձեռք է բերել առանձնապես խոշոր չափերի թմրամիջոց` 289 հատ «Սուբոտեքս» տեսակի դեղահաբ, որոնք պահվել են Մ.Ղանդիլյանի բնակարանում: Դրանցից 36 հատը, Մ.Ղանդիլյանի օժանդակությամբ, 2013թ. նոյեմբերի 6-ին ապօրինի իրացրել է այլ անձի:

Տ.Ղանդիլյանից թմրամիջոց` 10 հատ «Սուբոտեքս» տեսակի դեղահաբ է ցանկացել ձեռք բերել նաեւ նույն քրեակատարողական հիմնարկում պատիժը կրող Ա.Չալաբյանը` առանց իրացնելու նպատակի: Պայմանավորվածության համաձայն` Տ.Ղանդիլյանը Մ. Ղանդիլյանի միջոցով 2013 թվականի նոյեմբերի 7-ին` ժամը 12:30-ի սահմաններում, Դավիթ Բեկի փողոցում Ա.Մարգարյանին է հանձնել 10 հատ «Սուբոտեքս»` Չալաբյանին փոխանցելու համար:

Սակայն Ա.Մարգարյանը չի հասցրել թմրամիջոցը հանձնել Չալաբյանին, քանի որ նույն օրը բերման է ենթարկվել ոստիկանության բաժին, որտեղ նրա անձնական խուզարկությամբ այն հայտնաբերվել եւ առգրավվել է:
Նույն օրը Ա.Մարգարյանին թմրամիջոցը իրացնելու կասկածանքով Երեւանի Դավիթ Բեկ փողոցից բերման է ենթարկվել նաեւ Մ.Ղանդիլյանը:

Տեղեկանալով այդ մասին` Տ.Ղանդիլյանը կապվել է իր բարեկամուհու` Ք.Գրիգորյանի հետ եւ խնդրել շտապ գնալ Տ.Ղանդիլյանի բնակարան` թմրամիջոցներն այնտեղից դուրս հանելու համար:

Ք.Գրիգորյանը Մ.Ղանդիլյանի բնակարանում գտել է թմրամիջոցները եւ թաքցնելու նպատակով պահել իր մոտ, ապա դրանք փոխադրել Թբիլիսյան խճուղի եւ հանձնել այլ կնոջ` Ս.Ժամկոչյանին, որոնք էլ նոյեմբերի 8-ին հայտնաբերվել են ոստիկանների կողմից` Ժամկոչյանի անձնական խուզարկությամբ:

Նշված 6 անձանց մասով նախաքննությունն ավարտվել է եւ ձեռք բերված ապացույցների հիման վրա Տ.Ղանդիլյանին մեղադրանք է առաջադրվել՝ ՀՀ քրեական օրենսգրքի 266-րդ հոդվածի 3-րդ մասի 2-րդ կետով, Մ.Ղանդիլյանին՝ ՀՀ քրեական օրենսգրքի 38-266-րդ հոդվածի 3-րդ մասի 2-րդ կետով, Ա.Մարգարյանին՝ ՀՀ քրեական օրենսգրքի 34-38-268-րդ հոդվածի 2-րդ մասի 2-րդ կետով, Ա.Չալաբյանին՝ ՀՀ քրեական օրենսգրքի 34-268-րդ հոդվածի 2-րդ մասի 2-րդ կետով , Ք.Գրիգորյանին՝ ՀՀ քրեական օրենսգրքի 268-րդ հոդվածի 3-րդ մասով եւ 334-րդ հոդվածի 1-ին մասով, Ս.Ժամկոչյանին՝ ՀՀ քրեական օրենսգրքի 268-րդ հոդվածի 3-րդ մասով
Քրեական գործը` մեղադրական եզրակացությամբ ուղարկվել է դատախազություն, եւ նախաքննության օրինականության նկատմամբ հսկողություն իրականացնող դատախազը հաստատել է այն։

Քրեական գործն ուղարկվել է Կենտրոն եւ Նորք-Մարաշ վարչական շրջանների ընդհանուր իրավասության դատարան` ըստ էության քննելու համար: