Մոսկվայի Տրոիցկի շրջանի դատարանի կողմից մեղավոր ճանաչված եւ 6 տարի 9 ամսվա բանտարկության դատապարտված Հրաչյա Հարությունյանի ընտանիքը դեռ չի դիմել Հայաստանի պատկան մարմիններին՝ դատապարտյալին Հայաստան տեղափոխելու հարցով: NEWS.am-ի թղթակցի հետ զրույցում նրա դուստրը՝ Լիլիթ Հարությունյանը հայտնեց, որ դեռ սպասում են Վերաքննիչ դատարան ներկայացված բողոքի պատասխանին:
«Նոյեմբերի 25-ին Վերաքննիչը որոշում կկայացնի, այս պահին դեռ տեղափոխվելու մասին խոսք չկա: Սպասում ենք այդ որոշմանը: Մշտապես կապի մեջ ենք փաստաբաննեի հետ»,- ասաց նա:
Լիլիթի խոսքով՝ հոր մոտ ամեն ինչ նորմալ է, նա որեւէ առողջական խնդիր չունի:
Նշենք, որ Վերաքննիչ դատարան ներկայացրած բողոքը վերաբերում է դիտավորյալ կեղծ փաստաթղթեր ներկայացնելու մեղադրանքին:
Հիշեցնենք, որ ավտովթարը տեղի էր ունեցել 2013 թվականի հուլիսի 13-ին` Պոդոլսկի մոտակայքում: Հարությունյանի վարած «ԿամԱԶ»-ը բախվել էր ուղեւորափոխադրող ավտոբուսի, ինչի հետեւանքով մահացել էր 18 մարդ, վիրավորվել 60-ից ավելի մարդ: Քննությունը պարզել էր, որ բեռնատարի արգելակները վատ են աշխատել, եւ Հարությունյանը տեղյակ է եղել այդ մասին: