Ափսոսանքի է արժանի, որ Ադրբեջանը՝ անտեսելով ուղղաթիռի անձնակազմի անդամների մարմինների դուրս բերման եւ հրադադարի ռեժիմի նմանատիպ խախտումների բացառման համար պայմաններ ստեղծելու վերաբերյալ միջազգային հանրության կոչերը, շարունակում է հանդես գալ հայտարարություններով, որտեղ խեղաթյուրում է միջադեպի էությունը եւ նենգափոխում փաստերը: Այս մասին հաղորդել են ԼՂՀ ԱԳ նախարարությունից՝ մեկնաբանելով ԼՂՀ պաշտպանության բանակի ռազմաօդային ուժերին պատկանող ուղղաթիռի խոցման վերաբերյալ Ադրբեջանի ԱԳՆ-ի վերջին հայտարարությունը:
«Փորձելով արդարացնել իր կողմից միջազգային հումանիտար իրավունքի նորմերի կոպտագույն խախտումը՝ Բաքուն կրկին վկայակոչում է ՄԱԿ ԱԽ բանաձեւերը:
Անհրաժեշտ ենք համարում հիշեցնել, որ բոլոր չորս բանաձեւերի առաջնահերթ եւ կարեւորագույն պահանջը կրակի, բոլոր ռազմական եւ թշնամական գործողությունների անհապաղ դադարեցումն էր: Սակայն այս հիմնական պահանջն է բազմիցս խախտվել Ադրբեջանի կողմից եւ մինչ օրս լիովին չի կատարվել, ինչի մասին է վկայում ուղղաթիռի խոցման միջադեպը:
Ադրբեջանի կողմից ՄԱԿ ԱԽ 4 բանաձեւերի պահանջների անտեսումը եւ նրա բացահայտ ձգտումը՝ հակամարտությունը լուծել ուժի միջոցով ու պատերազմի վերսկսման շարունակական սպառնալիքներն են արժեզրկել եւ անկիրառելի դարձրել սույն բանաձեւերը»,-ասված է ԼՂՀ ԱԳՆ հաղորդագրությունում: