Թուրքիայի քրդական «Ժողովուրդների դեմոկրատական» (HDP) կուսակցության կին պատգամավոր Սեբահաթ Թունջելը երկրի խորհրդարան է ներկայացրել Թուրքիայում տեղի ունեցած կոտորածները ճանաչելու եւ ներողություն խնդրելու օրինագիծ։
Թուրքական Sondakika կայքի փոխանցմամբ՝ «Ժողովուրդների դեմոկրատական» կուսակցության պատգամավոր Սեբահաթ Թունջելի կողմից խորհրդարան ներկայացված օրինագծի մեջ նշվում է, որ Թուրքիայի նախագահը պետության կողմից խորհրդարանում պետք է պաշտոնապես ներողություն խնդրի, հաջորդ օրը գնա իրադարձության վայրը եւ այնտեղ կարդա ներողության տեքստը։
«Պաշտոնապես ներողություն խնդրելուց հետո մեկ տարվա ընթացքում պետք է խորհրդարանում ստեղծված հատուկ հանձնաժողով ստեղծել եւ այդ թեմայի հետ կապված պետության բոլոր արխիվները բացել»,-նշվում է օրինագծում։
Նշվում է, որ այս օրինագիծը եթե հաստատվի, ապա դրանով Թուրքիան ճանաչելու է նաեւ Հայոց ցեղասպանությունը եւ ապրիլի 24-ը նշի որպես սգո օր։
