«Նաիրիտ» գործարանի աշխատակիցները վաղը, ամենայն հավանականությամբ, կստանան իրենց մեկ ամսվա աշխատավարձը: Այս մասին NEWS.am-ի թղթակցի հետ զրույցում ասաց «Նաիրիտի» մամուլի քարտուղար Անուշ Հարությունյանը:
Նա նշեց, որ մեկ ամսվա աշխատավարձի ֆոնդը կազմում է մոտ 1 մլն դոլար: Կառավարությունը խոստացել էր մինչեւ տարեվերջ մարել ամբողջ 12-15 ամսվա պարտքը, սակայն առայժմ ոչինչ չեն վճարել նաիրիտցիներին:
Մամուլի խոսնակը տեղեկացրեց, որ այսօր գործարան է այցելելու Էներգետիկայի եւ բնական պաշարների նախարար Երվանդ Զախարյանը, ով հանդիպելու է աշխատակիցների հետ: Հանդիպմանը «Նաիրիտում» անհամբեր են սպասում, հուսով են, որ նախարարը վատ նորություններով չի գալիս եւ աշխատավարձների պարտք մարելու խոստումը չեն դրժի:
Նշենք, որ «Նաիրտի» աշխատակիցների չվճարված աշխատավարձերը կազմում են 15 մլն դոլար։
Հիշեցնենք, որ «Նաիրիտի» աշխատակիցների աշխատավարձը մարվում է պետական էներգետիկ ընկերությունների՝ Երեւան ՋԷԿ-ի եւ Որոտանի ՀԷԿ-ի եկամտի հաշվին:
