Մի քանի օրից վերջապես շահագործման կհանձնվի Գյումրու Մուշ–2 թաղամասում կառուցված բազմաբնակարանային շենքերը` նախատեսված երկրաշարժից անօթեւան 1056 ընտանիքների համար:
Նորակառույց թաղամասում կատարված շինարարական աշխատանքների որակին ծանոթանալու նպատակով «Շիրակ կենտրոնի» ներկայացուցիչները այսօր՝ հուլիսի 7-ին այցելել են թաղամաս, ուր դիտարկել են մի շարք շենքերի բնակարաններում կատարված ներքին հարդարման աշխատանքները: Դիտարկումներով թեեւ կատարված աշխատանքների որակը հեռու է գերազանց լինելուց, սակայն բնակվելու համար կարելի է համարել տանելի:
Անշուշտ պատկերը պարզապես սարսափելի կլիներ, եթե անցած տարվա դեկտեմբերին շինհրապարակ այցելած Հայաստանի նախագահի կարգադրությամբ չվերանորոգվեին եւ չկահավորվեին նորակառույց բնակարանները: «Կարծում ենք գոնե ապագայի համար պետք է դասեր քաղեն ինչպես շինարարությունը իրականացնող «Գլենդել Հիլզ» ՓԲԸ–ն, այնպես էլ մեր բարձրաստիճան պաշտոնյաները եւ նման մեծ ծավալ ունեցող շինհրապարակներ իրենց այցելությունները կազմակերպեն ոչ թե շինաշխատանքների ավարտին, այլ ընթացքում, շինարարության որակին էլ ուշադրություն դարձնեն ի սկզբանե»,- նշել են ՀԿ-ի ներկայացուցիչները:
Հատուկ շեշտվել է, որ նորակառույց թաղամասի ամենամեծ թերություններից մեկն էլ կանաչ տարածքների ոռոգման համակարգի բացակայությունն է: