Պաշտպանության նախարարության Վարդենիսի զինվորական հոսպիտալից երկկողմանի թոքաբորբ ախտորոշմամբ, մարմնական վնասվածքներով ՀՀ ՊՆ կենտրոնական կլինիկական զինվորական հոսպիտալ 2014թ.-ի հունվարի 13-ին տեղափոխված N զորամասի ժամկետային զինծառայող, նորակոչիկ Մհեր Խլղաթյանի գործով դատաբժիշկը չի բացառում, որ նորակոչիկը մարմնական վնասվածքները ստացած լինի զորամասի զուգարանի մոտ ընկնելու հետեւանքով: Այս մասին NEWS.am-ի թղթակցի հետ զրույցում ասաց գործով կալանավորված բուժծառայության պետ, կապիտան Արման Թադեւոսյանի փաստաբան Լիպարիտ Սիմոնյանը:
«Ես պնդում եմ, որ սա սարքած գործ է, գործի ապացույցներն էլ դրա մասին են վկայում: Գործում կան փաստական տվյալներ, որ Մհերը բուժմասի զուգարանում ընկել է, ուշագնաց է եղել, հետեւաբար չի բացառվում, որ վնասվածքները նա ստացած լինի հենց այդ ընկնելու հետեւանքով: Դատաբժիշկն էլ դա չի բացառում, գործով վկաներն էլ են այդ մասին փաստում»,- ասաց փաստաբանը:
Լիպարիտ Սիմոնյանի խոսքով՝ հենց այս պատճառով են անընդհատ հետաձգվում դատական նիստերը, Մհեր Խլղաթյանը երբեք նիստերին չի ներկայացել:
«Եթե ծեծած լինեին Մհերին, կգար, դրա մասին կխոսեր, բայց չեն գալիս, երեւի ասելիք չունեն»,- ավելացրեց փաստաբանը:
Նշենք, որ գործը քննվում է Գեղարքունիքի մարզի ընդհանուր իրավասության դատարանի Վարդենիսի նստավայրում: Հաջորդ դատական նիստը նշանակվել է 2015թ.-ի հունվարի 14-ին:
Հիշեցնենք, որ 2014թ. հունվարի 13-ին, ժամը 02-10-ի սահմաններում ՀՀ ՊՆ Վարդենիսի զինհոսպիտալից երկկողմանի թոքաբորբ ախտորոշմամբ, մարմնական վնասվածքներով ՀՀ ՊՆ կենտրոնական կլինիկական զինվորական հոսպիտալ էր տեղափոխվել N զորամասի ժամկետային զինծառայող, նորակոչիկ Մհեր Արմենի Խլղաթյանը:
Գործի շրջանակներում բուժծառայության պետ, կապիտան Արման Դավիթի Թադեւոսյանը կալանավորվել էր հունվարի 17-ին, նրան մեղադրանք էր առաջադրվել Քրեական օրենսգրքի 358.1 հոդվածի 3-րդ մասի 1-ին մասի (մի խումբ անձանց կողմից զինվորական ծառայության պարտականությունները կատարելու կապակցությամբ ստորադասին նկատմամբ բռնություն գործադրելը): Զորամասի ժամկետային զինծառայող, կրտսեր սերժանտ Վահե Արմենի Օհանյանը եւ դասակի հրամանատար, ավագ լեյտենանտ Հրաչ Սամվելի Մնացականյանը կալանավորվել էին հունվարի 18-ին, նրանց մեղադրանք էր առաջադրվել 358.1 հոդվածի 3-րդ մասի 1-ին կետի (մի խումբ անձանց կողմից զինվորական ծառայության պարտականությունները կատարելու կապակցությամբ ստորադասին նկատմամբ բռնություն գործադրելը) եւ 358.1 հոդ. 2-րդ (զինվորական ծառայության պարտականությունները կատարելու կապակցությամբ ստորադասի նկատմամբ բռնություն գործադրելը) մասերով: