Նոր տարվա նախաշեմին NEWS.am Vera&Football-ը ձեզ է ներկայացնում Հենրիխ Մխիթարյանի «Շախտյորում» խփած բոլոր գոլերը:
Դոնեցկի «Շախտյորում» անցկացրած պաշտոնական հանդիպումներում Հենրիխ Մխիթարյանը մասնակցել է 106 խաղի և դարձել 44 գոլի հեղինակ:
Ուկրաինայի Պրեմիեր լիգա ՝ 72 խաղ, 38 գոլ
Ուկրաինայի գավաթ ՝ 11 խաղ, 4 գոլ
Ուկրաինայի սուպերգավաթ ՝ 2 խաղ
Չեմպիոնների լիգա ՝ 21 խաղ, 2 գոլ
Մխիթարյանը մրցակից թիմերից ամենաշատը գրավել է Օդեսսայի «Չերնոմորեցի» դարպասը (5 գոլ): Մեր ֆուտբոլիստը 4 անգամ հաջողության է հասել Լուգանսկի «Զարյայի» դեմ խաղերում և 3-ական անգամ գրավել է Դոնեցկի «Մետալուրգի», «Տավրիայի», «Մետալիստի», «Կրիվբասի», «Վոլինի» և Կիևի «Արսենալի» դարպասները:
Հենրիխ Մխիթարյանն ավելի շատ գոլի հեղինակ է դարձել հանդիպման վերջին 15 րոպեներին՝ մրցակիցների դարպասը գրավելով 11 անգամ:
Առավել հաջող են ստացվել Մխիթարյանի աջ ոտքով կատարած հարվածները (28 գոլ): Հայ ֆուտբոլիստը 13 անգամ մրցակիցների դարպասը գրավել է ձախ ոտքով և 3 անգամ հաջողության է հասել գլխի կատարած հարվածով:
Իր թիմի սեփական հարկի տակ կայացած հանդիպումներում Մխիթարյանը դարձել է 22 գոլի հեղինակ և նույնքան անգամ աչքի է ընկել արտագնա խաղերում:
Հենրիխ Միթարյանն իր գոլերի առյուծի բաժինը խփել է մրցակցի տուգանային հրապարակի ներսում (40 գոլ): 3 անգամ Մխիթարյանն աչքի է ընկել տուգանային հրապարակից դուրս և 1 անգամ մրցակցի դարպասը գրավել է 11 մետրանոց հարվածով:
Բոլորից շատ՝ 5-ական անգամ Մխիթարյանին գոլային փոխանցումներ են կատարել Դարիո Սռնան, Լուիս Ադրիանոն և Վիլլիանը: 4 գոլային փոխանցման հեղինակ է դարձել Ֆեռնանդինյոն:
Հիշեցնենք, որ դեկտեմբերի 28-ին տեղի կունենա Հայաստանի տարվա լավագույն ֆուտբոլիստի մրցանակաբաշխությունը: Հենրիխ Մխիթարյանն այս անվանակարգում չորս անգամ ճանաչվել է լավագույնը:
Նյութը պատրաստեց Հրաչ Նազարյանը