Կարմիր Խաչի միջազգային կոմիտեի ներկայացուցիչներն առայժմ չեն այցելել ադրբեջանական կողմում գտնվող հայ պատանդին: Այս մասին NEWS.am-ի թղթակցին տեղեկացրեց ԿԽՄԿ երեւանյան պատվիրակության հաղորդակցության ծրագրերի ղեկավար Զառա Ամատունին:
Հիշեցնենք, որ ԼՂՀ զինված ուժերի նախկին պայմանագրային զինծառայող Արսեն Բաղդասարյանը գերեվարվել է անցյալ տարվա դեկտեմբերի 26-ին: Տեղեկատվության համաձայն, հիմա արդեն նախկին պայմանագրայինն աչքի է ընկել անկարգապահ վարքով, ինչը հանգեցրել է քրեական հետապնդման: Խուսափելով դատավարությունից՝ Բաղդասարյանը փախել է Ադրբեջան:
Ադրբեջանական կողմն արդեն 19-րդ օրն է՝ ԿԽՄԿ-ի ներկայացուցիչներին թույլ չի տալիս այցելել գերուն: Հարեւան պետության իշխանությունների նման պահվածքի պատճառների մասին պաշտոնապես չի հաղորդվում:
Միաժամանակ, գերուն այցելել են ադրբեջանական իրավապաշտպանները: Նրանց խոսքով, Արսեն Բաղդասարյանը խնդրել է իրեն երրորդ կողմի հանձնել:
