Գյումրիի ողբերգության հանդեպ էմոցիոնալ մոտեցումը հասկանալի է, բայց դրանից հայ-ռուսական հարաբերությունները վերանայելու անհրաժեշտություն չի ծագում: Այս մասին հունվարի 26-ի մամուլի ասուլիսում հայտարարել է ՀՀ արտգործնախարար Էդվարդ Նալբանդյանը:
Ի պատասխան հարցին, թե Գյումրիի ողբերգության համատեքստում գոհ են արդյոք ՀՀ իշխանությունները ռուսական կողմի հետ հարաբերություններից կամ պե՞տք է ինչ-որ բան փոխել, նախարարը նշել է. «Չեմ կարծում ճիշտ է կապակցել այդ երկու բաները՝ մեր երկկողմ հարաբերությունները եւ ողբերգությունը, որ եղավ Գյումրիում, որի վերաբերյալ հանրային կարծիքի վրդովմունքը եւ զայրույթը մարդկային է եւ հասկանալի: Այնպես ինչպես, որ դուք եք դուք եք ներկայացնում, որ պետք է վերանայել, փոխել՝ չեմ կարծում` տեղին է: Մենք ունենք դաշնակցային, ռազմավարական հարաբերություններ Ռուսաստանի հետ, համատեղ ջանքերով մտադիր ենք այդ հարաբերություններն առավել խորացնել, ամրապնդել եւ զարգացնել»:
Էդվարդ Նալբանդյանն ընդգծել է, որ ողբերգության օրը հանրապետության նախագահը սելեկտորային խորհրդակցություն է անցկացրել իրավապահ մարմինների ղեկավարների հետ, հանձնարարարականներ տվել եւ նշել, որ հանցագործությունը պետք է բացահայտվի ամենակարճ ժամկետում, մեղավորները պատժվեն օրենքի ամբողջ խստությամբ: Այս հարցում հայկական կողմը համագործակցում է ռուսաստանցի գործընկերների հետ:
Նախարարը հիշեցրել է, որ նախագահները հեռախոսազրույց են ունեցել, կապերը պահպանվում են բոլոր մակարդակներով: «Փոխըմբռնում կա առ այն, որ քննությունը պետք է բաց եւ թափանցիկ լինի, եւ մեղավորները պետք է պատժվեն օրենքի ամբողջ խստությամբ»:
Հարցին, թե արդյոք ռուսական կողմը խախտել է երկկողմ համաձայնագիրը Վալերի Պերմյակովի ձերբակալության ընթացքում, նախարարը պատասխանել է, որ ըստ օրենքի՝ փաստաթղթերի մեկնաբանության տարաձայնությունների դեպքում կողմերը դիմում են ԱԳՆ, բանակցություններ են անցկացվում նման հարցերի լուծման համար հանձնաժողով ստեղծելու ուղղությամբ: Եթե այդպիսի հանձնաժողով է ստեղծվում եւ դարձյալ արդյունք չի լինում, այդ ժամանակ հարցը լուծվում է դիվանագիտական ճանապարհով: