Հայ գիտնականները լատվիացի գործընկերների հետ համատեղ ձեռնարկություն են ստեղծել՝ նորարարական բիոպարարտանյութեր արտադրելու համար: Այս մասին NEWS.am-ի թղթակցի հետ զրույցում հայտնեց նախագծի համահեղինակ Գրիգոր Գյուլխանդանյանը:
Ձեռնարկությունը, որը Arlabion են կոչել (Armenian Latvian Bio News), ստեղծվել է 2014 թվականի նոյեմբերին, Մեծ Բրիտանիայում: Վերջերս բրիտանական հիմնադրամներից մեկը հավանության է արժանացրել ծրագիրն ու պատրաստվում է ֆինանսավորել այն:
2010 թվականին Գյուլխանդանյանի թիմը 15 հազար դոլարի չափով դրամաշնորհ է ստացել ամերիկյան CRDF (Civilian Research and Development Foundation) հիմնադրամից, որի շնորհիվ Արարատյան դաշտում իր ստեղծած նյութը փորձարկել է բույսերի սնկերի դեմ:
Դրանից հետո նորարարները որոշել են նյութին պարարտանյութ ավելացնել: Վերջինի հիմնական բաղադրիչը ցեոլիտն է, որի զգալի պաշարներ կան երկրի հյուսիս-արեւելյան Նոյեմբերյանի շրջանում:
«Սովորաբար ցեոլիտը տալիս են 1 հեկտարին՝ 1.5 տոննա: Իսկ մեր պարարտանյութը փորձերի ժամանակ տրվել է 50 կգ-ով, իսկ բերքատվությունը բարձրացել է մինչեւ 50%»,- հավելեց Գյուլխանդանյանը:
Հիմա գիտնականները Երեւանում հիմնադրված փոքրիկ արտադրությունում երկու անուն արտադրանք են թողարկում, սակայն նշված արտերկրյա աջակցության հաշվին պատրաստվում են ընդլայնել գործունեությունը: Արտադրության ներկա ծավալները տարեկան 1-2 տոննա է, որը ծրագրվում է զգալիորեն ավելացնել:
«Շատ կարեւոր է, որ մեր նախագիծն անհրաժեշտ բոլոր բաղադրիչներն ունի. գիտնականներն իրենց գործն են անելու, ներդրողները՝ իրենց, շուկայի մասնագետները՝ իրենց»,- նշեց Գյուլխանդանյանը:
