Կոտայքի մարզի ընդհանուր իրավասության դատարանում սկսվել է դերասան Վարդան Պետրոսյանի գործով դատական վերջին նիստը։ Այսօր դատավոր Վաղինակ Մկրտչյանը կհրապարակի գործով դատավճիռը։ (ֆոտոռեպորտաժ)
NEWS.am-ի հետ զրույցում Վարդան Պետրոսյանի փաստաբան Նիկոլայ Բաղդասարյանն ասաց, որ դատավորը օրենքով վարվելու դեպքում պետք է դեպքի վայրի զննության ապացույցներն անթույլատրելի ճանաչի եւ ըստ այդմ կատարի արդարացման դատավճիռ:
«Եթե օրենքով չվարվի դատավորը, ապա պետք է բավարարի դատախազի միջնորդությունը եւ 6 տարի 6 ամիս ազատազրկման դատապարտի նրան, սակայն այս դեպքում էլ նա 6 ամիս հետո ազատ կարձակվի»,-ասաց փաստաբանը:
NEWS.am-ի թղթակիցը հաղորդում է, որ Վարդան Պետրոսյանին սատարելու համար դատարան է գնացել «Ժառանգություն» կուսակցության առաջնորդ Րաֆֆի Հովհաննիսյանը, մեծ թվով հարազատներ, ընկերներ, երկրպագուներ։ Դահլիճը լեփ լեցուն է։ Տուժող կողմից՝ Հակոբյանների ընտանիքից ոչ ոք դատական նիստին չի ներկայացել։
Նշենք, որ դատախազ Արթուր Սարգսյանը պահանջել է դերասանին ենթարկել 6 տարի 6 ամիս տարվա ազատազրկման՝ 3 տարով զրկելով մեքենա վարելու իրավունքից:
Հիշեցնենք, որ ըստ մեղադրական եզրակացության՝ Վարդան Պետրոսյանը 2013թ. հոկտեմբերի 20-ին, ժամը 22:10–ի սահմաններում, Կոտայքի մարզի Սարալանջ գյուղի կողմից դեպի Երեւան ուղղությամբ վարելիս «ԲՄՎ-320» մակնիշի մեքենայով բախվել է «Վազ 21214» մակնիշի մեքենայի հետնամասին։ Վթարի հետեւանքով «Վազ-21214» մակնիշի մեքենայի ուղեւորներ Էդվարդ եւ Էդգար Հակոբյանները մահացել են, ուղեւորներ Տաթեւիկ Հակոբյանը, Հայկ Հակոբյանը, էմմա Հակոբյանը, ինչպես նաեւ վարորդ Արթուր Հակոբյանն ստացել են վնասվածքներ: Վարդան Պետրոսյանին մեղադրանք է առաջադրվել ՀՀ քրեական օրենսգրքի 242-րդ հոդվածի 3-րդ մասի հատկանիշներով՝ «Ճանապարհային երթեւեկության կամ տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ»։
Տուժող կողմը փորձում է ապացուցել, որ Վարդան Պետրոսյանը վթարի պահին եղել է ալկոհոլի ազդեցության տակ եւ գերազանցել է թույլատրելի արագությունը։ Դերասանը հերքում է այդ վարկածը եւ իրեն հերթին փորձում է ապացուցել, որ տուժող կողմի մեքենան կայանած է եղել ոչ թե ճանապարհի կողնակին, այլ երթեւեկելի գոտում, ունեցել է անսարքություններ։
Լուսանկարները՝ Արսեն Սարգսյանի/NEWS.am
