«Օֆշորի գործով» ինչպես նախաքննության, այնպես էլ մեղադրյալ Աշոտ Սուքիասյանի կալանքի ժամկետը երկու ամսով երկարեցրել են: NEWS.am-ի թղթակցի հետ զրույցում Աշոտ Սուքիասյանի փաստաբան Յուրիկ Խաչատրյանը նշեց, որ նախաքննության եւ կալանքի ժամկետը երկարացվել է մինչեւ ապրիլի 19-ին: Շատ հնարավոր է, որ մինչեւ ապրիլի վերջ գործը ավարտվի եւ այն ուղարկվի դատարան: Փաստաբանն ասաց, որ արդեն ավարտվում է նշանակված ֆինանսատնտեսագիտական փորձաքննությունը, դրա նշանակումից հետո գործի շրջանակներում ակտիվ գործողություններ չեն եղել:
Յուրիկ Խաչատրյանը նշեց նաեւ, որ իր պաշտպանյալին եւս խաբել են, 2,3մլն դոլար է փոխանցել, որպեսզի հանքի 66 տոկոսը գրանցեն իր անունով, սակայն այլազգիները նրան խաբել են: Այս մասով փաստաբանը փաստաթղթեր է ներկայացրել քննությանը ու հույս ունի, որ այդ ուղղությամբ եւս գործողություններ կարվեն:
Հիշեցնենք, որ դեռ 2009թ. էկոնոմիկայի նախարարության շենքում նախարար Ներսես Երիցյանի մոտ ՀՀ այդ ժամանակ վարչապետ Տիգրան Սարգսյանի գլխավորությամբ հանդիպում-խորհրդակցություն էր կազմակերպվել 23 արդյունաբերական կազմակերպությունների ղեկավարների հետ, որի ժամանակ քննարկվել էր Ռուսաստանի՝ Հայաստանին տրամադրված 500 միլիոն դոլարի վարկը, որից 100 միլիոնը Ռուսաստանը պետք է տար ապրանքային տեսքով՝ ադամանդի հումքով։ Իսկ այդ 100 միլիոնի վարկը պետք է բաժանվեր այդ 23 կազմակերպությունների միջեւ, որպեսզի դրանք սկսեին աշխատել։ Գործարար Փայլակ Հայրապետյանն առաջարկել էր գրավադրել իր 33 մլն դոլար արժողությամբ իր ամբողջ անշարժ գույքը եւ «Ամերիաբանկը»-ից ստացված մոտ 10 միլիոն դոլարը տվել Աշոտ Սուքիասյանին, որն էլ վերցնելով գումարը՝ գնացել էր երկրից: 2014թ. փետրվարին Աշոտ Սուքիասյանին հայտնաբերել էին Վրաստանում: Հունիսի 19-ին՝ Վրաստանից Հայաստան արտահանձնվելուց անմիջապես հետո, Աշոտ Սուքիասյանը կալանավորվել էր:
