Կանադայի Հայ Դատի հանձնախումբը դատապարտել է Կանադական թուրքերի խորհրդի վերջին նախաձեռնությունը, որոնք Միացյալ Նահանգներից Հայոց ցեղասպանությունը ժխտող երկու անձանց հրավիրել են՝ կանադական խորհրդարանականների եւ օրենսդիր մարմնի անձնակազմի առջեւ ելույթ ունենալու համար:
Ըստ «Nouvelles d'Arménie»-ի, Կանադական թուրքերի խորհուրդը խորհրդարանի ռեստորանում կազմակերպած նախաճաշի ժամանակ «Առաջին աշխարհամարտը. արեւելյան Անատոլիայում մարդկային տառապանքների 100-րդ տարելիցը» թեմայով քննարկում է անցկացրել:
«Սակայն հրավիրելիս չի նշվել, որ քննարկման բանախոսներն իրենց կարիերան ստեղծել են Հայոց ցեղասպանության ժխտման վրա, որ նրանք, անկասկած, պատմության աղավաղված տարբերակն են ներկայացնելու եւ դատապարտելու են Հայոց ցեղասպանությունը ճանաչելու՝ Կանադայի համարձակ որոշումը»,- ասված է Կանադայի Հայ դատի հանձնախմբի հայտարարությունում:
