Երեքշաբթի համաշխարհային շուկայում նավթի գները բարձրացել են նախօրեին Brent տեսակի նավթի գների կտրուկ անկումից հետո, գրում է Bloomberg-ը։

Brent տեսակի նավթի ապրիլյան ֆյուչերսները Լոնդոնի ICE բորսայում Երեւանի ժամանակով ժամը 9։35-ի դրությամբ թանկացել են 1.48 տոկոսով եւ կազմել 60.42 դոլար մեկ բարելի դիմաց։ Նշենք, որ երկուշաբթի՝ բորսան փակելու պահին, ֆյուչերսների գինը նվազել էր՝ հասնելով 59.54 դոլարի մեկ բարելի դիմաց։

Նյու Յորքի բորսայում WTI տեսակի նավթի գինը 0,79 տոկոսանոց աճ է գրանցել՝  կազմելով 49.98 դոլար մեկ  բարելի դիմաց, գրում է «Ինտեֆաքս»-ը։ 

Շուկայի ուշադրությունը բեւեռված է ԱՄՆ պաշարներին, որոնց մասին տեղեկությունները կհրապարակվեն չորեքշաբթի։ Bloomberg-ի փորձագետների գնահատմամբ՝ ԱՄՆ նավթի պաշարները անցյալ շաբաթ աճել են 3.9 բարելով եւ 1982թ. ի վեր՝ հասել են իրենց առավելագույն ցուցանիշին՝ 434.1 մլն բարել։

Bank of America Corp-ի վերլուծաբանները կարծում են, որ նավթը կարող է էժանանալ մինչեւ 32 դոլար մեկ բարելի դիմաց, քանի որ ձմռան ավարտին կպակասի վառելիքի պահանջարկը։

ՕՊԵԿ-ում Bloomberg-ի աղբյուրները հայտնել են, որ այդ կազմակերպության անդամ պետությունները մտադիր չեն շուկայում իրավիճակը քննարկելու համար արտահերթ նիստ գումարել։