Սիրիայի Ժողովրդական ժողովի նախագահ, դոկտոր Մուհամմադ Ջիհադ ալ-Լահամը մարտի 4-ին ընդունեց Սիրիայում ՀՀ դեսպան Արշակ Փոլադյանին, Դամասկոսի Հայոց թեմի առաջնորդ Տեր Արմաշ եպիսկոպոս Նալբանդյանին, Կաթողիկե համայնքի հոգեւոր ներկայացուցիչ վարդապետ Գեւորգ Բահիին, Դամասկոսի հայ համայնքի քաղաքական եւ գավառական ժողովների ղեկավարներին, ինչպես նաեւ Հայոց ցեղասպանության 100-րդ տարելիցի միջոցառումներն իրականացնող Սիրիայի հանձնաժողովի անդամներին:
Նախագահը ողջունեց դեսպան Փոլադյանին եւ նրան ուղեկցող պատվիրակության անդամներին, որից հետո մասնակիցները քննարկեցին հայ-սիրիական միջխորհրդարանական համագործակցությանն առնչվող հարցեր: Հանդիպման ընթացքում դեսպան Փոլադյանը զրուցակցին ներկայացրեց Հայոց ցեղասպանության 100-րդ տարելիցին նվիրված միջոցառումները:
Սիրիայի Ժողովրդական ժողովի ղեկավարի հետ հանդիպմանը հաջորդեց Ժողովրդական ժողովի մարդու իրավունքների եւ արտաքին հարաբերությունների հանձնաժողովների անդամ Մարիա Սաադեի եւ այլ պատգամավորների նախաձեռնությամբ կազմակերպված համատեղ նիստը` դեսպանի, նրան ուղեկցող պատվիրակության եւ Ժողովրդական ժողովի մարդու իրավունքների եւ հաշտեցման հանձնաժողովների անդամների մասնակցությամբ` նվիրված Հայոց ցեղասպանության 100-րդ տարելիցին:
Նիստի ընթացքում դեսպանը, շնորհակալություն հայտնելով Սիրիայի Ժողովրդական ժողովին, որպես կարեւոր հանգամանք ընդգծեց այն փաստը, որ Սիրիան, Ցեղասպանության օրերին դառնալով հանգրվան մազապուրծ հայերի համար, այսօր` 100 տարի անց, իրականացնում է նման միջոցառում երկրի օրենսդիր մարմնում:
Սիրիայի Ժողովրդական ժողովի հանձնաժողովների անդամների առջեւ Հայոց ցեղասպանության մասին պատմական համառոտ զեկույցով հանդես եկավ Դամասկոսի համալսարանի դասախոս, պատմական գիտությունների թեկնածու Նորա Արիսյանը:
Լսումների ընթացքում ելույթ ունեցան Սիրիայի Ժողովրդական ժողովի մի շարք անդամներ, ովքեր արտահայտեցին իրենց համերաշխությունը հայ ժողովրդին` մեկ անգամ եւս ընդգծելով հայերի դերը Սիրիայի սոցիալ-տնտեսական եւ հասարակական կյանքում:
