Նաիրա Զոհրաբյանը պինդ անձնավորություն է, բայց ամենակարող չէ։ ԲՀԿ նորանշանակ առաջնորդի մասին այսօր՝ մարտի 6-ին, այսպիսի կարծիք հայտնեց քաղտեխնոլոգ Կարեն Քոչարյանը։
Նա նշեց, որ Նաիրա Զոհրաբյանին երկար տարիներ է ճանաչում եւ կարծում է, որ նա կկարողանա որեւէ բան փոխել Հայաստանում, թեեւ նրա համար դժվար է լինելու՝ որպես կին քաղաքական գործիչ։
«Նաիրա Զոհրաբյանի համար դժվար էր դառնալ կոալիցիայի մաս կազմած կուսակցության լիդեր, հետո դարձան այլընտրանք, թեեւ Նաիրա Զոհրաբյանը կողմ էր ընդդիմադիր կոչվելուն»,- ասաց քաղտեխնոլոգը։
Նրա խոսքով՝ երեկվանից ԲՀԿ-ն ավելի քաղաքական ուժ է դարձել։ Այնուամենայնիվ, քաղտեխնոլոգը համոզված է, որ քաղաքական դաշտն այլեւս փոշիացված է, չկան քաղաքական խաղացողներ եւ սա չի վերաբերվում միայն «Բարգավաճ Հայաստան» կուսակցությանը. «Քաղաքականությունն այսօր վերածել են բիզնեսի։ Փող պետք է, բայց սա չի նշանակում՝ ով փող ունի, պետք է մտնի քաղաքականություն։ Քաղաքական դաշտի համար փողը դարձել է նպատակ»։
Նշենք, որ նախագահ ՍերԺ Սարգսյանը փետրվարի 12-ին ՀՀԿ խորհրդի նիստում ունեցած ելույթի ժամանակ հայտարարել էր, որ Գագիկ Ծառուկյան քաղաքական դերակատարը երկրի համար դարձել է չարիք։ Նա նաեւ Ծառուկյանին ազատել է Ազգային անվտանգության խորհրդի անդամի կարգավիճակից, խոստացել, որ գործընթաց է սկսվելու Ծառուկյանի՝ ԱԺ նիստերից պարբերաբար բացակայելու կապակցությամբ։ Մեկ օր անց Ծառուկյանը հանդես եկավ հայտարարությամբ՝ նշելով, որ իրենք գնում են իշխանափոխության: Սակայն փետրվարի 17-ին տեղի ունեցած Սարգսյան-Ծառուկյան հանդիպումից հետո ԲՀԿ առաջնորդը նորից հայտարարությամբ հանդես եկավ՝ նշելով, որ հանրահավաքը չեղյալ է համարվում: Մարտի հինգին Ծառուկյանը հեռացավ ակտիվ քաղաքականությունից, իսկ ԲՀԿ առաջնորդ ընտրվեց Նաիրա Զոհրաբյանը։
