Իշխող Հանրապետական կուսակցությունն ուժեղ է ոչ թե այն պատճառով, որ լեգիտիմ է, նման վստահություն այդ կուսակցության հանդեպ չկա, այլ որովհետեւ նրան հակազդող ուժ չկա։ Իրականում այն թույլ է։ Այս մասին մարտի 6-ի մամուլի ասուլիսի ժամանակ հայտարարել է Կովկասի ինստիտուտի տնօրեն քաղաքագետ Ալեքսանդր Իսկանդարյանը՝ անդրադառնալով ՀՀԿ ԳՄ նիստից հետո ԱԺ խորհրդարանի փոխխոսնակ, ՀՀԿ մամուլի քարտուղար Էդուարդ Շարմազանովի այն հայտարարությանը, թե «բոլոր ճանապարհները անցնում են Մելիք Ադամյան փողոցով», որտեղ գտնվում է կուսակցության գրասենյակը։

Նրա խոսքով՝ հանրապետականները այդպես են վարվում, քանի որ չեն ցանկանում նորմալ աշխատել։ «Չէ՞ որ այլ սխեմայով աշխատելու դեպքում նրանք պետք  է պայմանավորվեն, հաշվի առնեն այլոց շահերը, կիսվեն, միություններ կազմեն։ Իսկ դա բարդ է, ավելի հեշտ է քանդել քեզ հակադրվող ամեն բան եւ դրանից հետո շարունակել միայնակ գործել։ Սակայն քաղաքական համակարգի համար դա վատ է»,- նշեց Ալեքսանդր Իսկանդարյանը։

Հիշեցնենք, որ մարտի 5-ին, ՀՀԿ ԳՄ նիստից հետո Շարմազանովը լրագրողներին հայտարարել էր, թե ժամանակը ցույց տվեց, որ Հայաստանում գաղափարապես ամենազդեցիկ կուսակցությունը Հանրապետականն է՝ հիշեցնելով իր կես տարվա առաջվա հայտարարությունը, որ «բոլոր ճանապարհներն անցնում են Մելիք Ադամյանով»։