Ռուսաստանի, Բելառուսի եւ Ղազախստանի առաջնորդների համար Սերժ Սարգսյանը գոյություն չունի: Այս մասին, այսօր՝ մարտի 27-ին, ԱԺ-ում ճեպազրույցների ժամանակ հայտարարել է ՀԱԿ խմբակցության քարտուղար Արամ Մանուկյանը՝ մեկնաբանելով Պուտինի, Լուկաշենկոյի եւ Նազարբաեւի Աստանայում մարտի 20-ին կայացած հանդիպումը:
«Մեր ղեկավարությունն ասում է, որ երեք առաջնորդները քննարկելի են ներքին խնդիրներ, իսկ Հայաստանը ոչ մի խնդիր չունի ԵՏՄ անդամ երկրների հետ: Բայց չի կարող լինել խնդիր, ասենք, Ռուսաստանի եւ Բելառուսի միջեւ, որը չվերաբերի մեզ, իսկ մեր խելացի ԱԳՆ-ն դա չի հասկանում»,-ասել է պատգամավորը:
Նրա կարծիքով, դժվար չէ գուշակել, թե ինչ տեղի կունենա հետագայում. հաջորդ հանդիպումը լինելու է մայիսի 8-ին, Հաղթանակի տոնի նախօրեին: «Հայաստանին կհրավիրեն զորահանդեսի եւ տոնակատարությունների, բայց երբ սկսվեն գործնական բանակցություններ, կրկին Հայաստանը դուրս կմնա: «Կարող են հրավիրել ֆուրշետի, բայց ոչ բանակցությունների սեղանի մոտ: Ոչ մեկի հետ չքննարկելով, երկու բլոկների նկատմամբ արկածախնդիր քաղաքականությունը կարող է Հայաստանին Եվրոպայի եւ Ռուսաստանի բախումների առանցք դարձնել»,-նշել է Մանուկյանը:
