![](img/news/26/32/01/default.jpg)
Հայ ժողովրդի հանդեպ 100 տարի առաջ վայրագություն է իրականացվել, սակայն Թուրքիան մինչ օրս չի ճանաչել կատարվածը, ինչը ոչ մարդկային քաղաքականության եւ վերաբերմունքի դրսեւորում է։ Այս մասին NEWS.am-ի հետ զրույցում ասաց Ռուսաստանի Դաշնային խորհրդի կոմիտեի անդամ, ՀՀ ԱԺ եւ ՌԴ Դաշնային ժողովի միջխորհրդարանական հանձնաժողովի համանախագահ Նիկոլայ Ռիժկովը։
Նրա խոսքով՝ Հայոց ցեղասպանության 100-ամյակի նախաշեմին Ռուսաստանում այդ հիշատակին նվիրված միջոցառումներ են անցկացվել։ «Վերջերս ինձ հարց տվեցին, թե ինչու է այդ ցավը մեզ հասկանալի։ Քանի որ նման մի բան մենք տեսել ենք 70 տարի առաջ, երբ գերմանացի օկուպանտները խորհրդային ժողովրդի հետ անում էին այն, ինչ 100 տարի առաջ հայերի հետ անում էին թուրքերը»։
Հարցին, թե քայլեր ձեռնարկվու՞մ են այսօր Իրաքում եւ Սիրիայում ցեղասպանության կանխման համար, Ռիժկովը պատասխանեց. «Որպեսզի բոլորն իրենց նորմալ պահեն ողջ աշխարհում՝ ե՛ւ Սիրիայում, ե՛ւ Իրաքում, ե՛ւ Լիբիայում, պետք է, որ Ռուսաստանը ուժեղ պետություն դառնա, եւ ԱՄՆ-ն հաշվի նստի նրա հետ։ Երբ կար ԽՍՀՄ-ը, Ամերիկան նման բաներ իրեն թույլ չէր տալիս, եւ որքան Ռուսաստանն այսօր ուժեղ է դառնում, այնքան հաճախ են նախագահ Վլադիմիր Պուտինին եւ Ռուսաստանին ագրեսոր համարում։ Մեզնից ի՞նչ ագրեսոր»։
Ռիժկովը նաեւ նշեց, որ ռուս խորհրդարանականները արել են հնարավոր ամեն բան Ցեղասպանության 100 ամյակը հավուր պատշաճի նշելու համար։