Հայոց ցեղասպանության 100-րդ տարելիցը ցնցում է, հուզիչ հարգանք եւ մեղավորների նկատմամբ ուժգին զայրույթ առաջացնում։ Այդ մասին ասել է իսրայելցի փորձագետ-ցեղասպանագետ Իսրայել Չարնին ՝ Երեւանում ընթացող «Ընդդեմ ցեղասպանության հանցագործության» երկօրյա գլոբալ ֆորումի ընթացքում։
«Ես առաջարկում եմ կազմակերպություն ստեղծել, որի շրջանակներում Հայաստանն ու հայ ժողովուրդը կառաջնորդի մեզ՝ ցեղասպանություն վերապրած ազգերի ներկայացուցիչներիս եւ բոլոր ապրումակցողներին։ Եւ կազմակերպության նպատակը կլինի հանուն կյանքի իրավունքի արշավի եւ միջոցառումների անցկացումը»,- ասել է փորձագետը։
Նա նկատել է, թե 1915 թվականը համարում է Հայոց ցեղասպանության սկիզբ։ Ըստ փորձագետի, այլախոհության ցանկացած ճնշում հիվանդություն է։
«Ես առաջարկում եմ, որ մենք դիմադրենք ցեղասպանությունների կրկնությանը։ Այդ համաշխարհային կազմակերպությունը, եթե աշխատի Հայաստանի գլխավորությամբ, կհամախմբի միջազգային դիրքորոշումը ցեղասպանության ժխտման դեմ, կօգնի ցեղասպանություն վերապրած բոլոր ազգերին։ Ես Հայաստանին կառաջարկեի գլխավորել այդ արշավը, որի նպատակը մարդկային կյանքի սրբության եւ անձեռնմխելիության քարոզչությունն է լինելու։ Անհրաժեշտ է բոլորին հասցնել, որ մարդկային կյանքն արժեքավոր եւ անձեռնմխելի է։ Դրանից ոչ միայն Հայաստանին, այլեւ ողջ աշխարհին մեծ օգւոտ կլինի»,- նշել է փորձագետը։