Այսօր, երբ տարբեր երկրներ Հայոց ցեղասպանությունը ճանաչող փաստաթղթեր են ընդունում, ճիշտ ժամանակն է, որ Թուրքիայի վրա ճնշում գործադրենք եւ ստիպենք ճանաչել Հայոց ցեղասպանությունը: Այս մասին NEWS.am-ի հետ զրույցում ասաց Կիպրոսի՝ ազգությամբ հայ քաղաքական գործիչ Մարիոս Կարոյեանը, որը Հայաստան է ժամանել Ցեղասպանության 100-րդ տարելիցին նվիրված միջոցառումներին մասնակցելու համար:
«Ապրիլի 24-ը կարեւոր օր է ոչ միայն հայերի, այլեւ ամբողջ մարդկության համար, քանի որ Ցեղասպանությունից 100 տարի անց քաղաքակիրթ աշխարհը դեռ լռում է: Թեեւ այսօր կան շատ խորհրդարաններ, կազմակերպություններ, որոնք ընդունել են Հայոց ցեղասպանությունը, դժբախտաբար, դեռ կան այնպիսի երկրներ, որոնք լռում են: Մենք պետք է պայքարենք, որ բոլորն ընդունեն Հայոց ցեղասպանությունը: Սա է մեր պարտականությունը, հենց այս ուղղությամբ պետք է շարժվենք առաջիկայում: Հիմա ճիշտ ժամանակն է, որ մենք ճնշում գործադրենք Թուրքիայի վրա, որ ճանաչի Հայոց ցեղասպանությունը: Սա է Թուրքիայի պարտավորությունը, եթե նա ցանկանում է լինել ժամանակակից պետություն»,- ասաց նա:
Մարիոս Կարոյեանի խոսքով՝ թեեւ անցած տարի Էրդողանն իր վշտակցությունն է հայտնել հայ ժողովրդին 1915թ. զոհված երեխաների համար, սակայն սա բավարար չէ. «Թուրքիան պետք է ճանաչի Հայոց ցեղասպանությունը, սա է Թուրքիայի պարտավորությունը միջազգային հանրության առջեւ»:
