Դեւիսի Կալիֆորնիական համալսարանի ուսանողական մարմնի ղեկավարությունը բանաձեւ է ընդունել, որը կոչ է անում Թուրքիայից դուրս բերել կապիտալը՝ կապված Հայոց ցեղասպանության ժխտման հետ: Բանաձեւը Դեւիսի եւ Կալիֆորնիական համալսարանին ընդհանրապես կոչ է անում Թուրքիայից դուրս բերել 72.6 մլն դոլարի չափով ներդրումներն ու արժեթղթերը՝ Հայոց ցեղասպանության եւ դրա ժխտման համար: Այս մասին NEWS.am-ը տեղեկացավ ԱՄՆ Հայ երիտասարդաց դաշնակցության մամուլի ծառայությունից:
Բանաձեւի առնչությամբ կազմակերպված լսումների ժամանակ ուսանող Վահե Սարգսյանն ասել է. «Ես սարսափելի զայրացա եւ հիասթափվեցի, երբ իմացա, որ Կալիֆորնիական համալսարանն ավելի քան 70 մլն դոլարի ներդրում է կատարում թուրքական պետությունում: Ինչպես երեւում է՝ Կալիֆորնիական համալսարանն անուղղակիորեն մասնակցում է Թուրքիայի կողմից Հայոց ցեղասպանության ժխտման արշավին: Ուրախ եմ, որ Դեւիսի Կալիֆորնիական համալսարանի ուսանողական մարմնի ղեկավարությունը, բուհի մյուս մասնաճյուղերի հետ միասին, հանդես է եկել նախաձեռնությամբ, որն ուղղված է Թուրքիայից կապիտալի դուրսբերմանը. երկիր, որը կանոնավոր կերպով ժխտում է Ցեղասպանությունը»:
Հիշեցնենք, որ նման բանաձեւեր են ընդունել նաեւ Լոս Անջելեսի, Բերքլիի եւ Իրվայնի Կալիֆորնիական համալսարանների ուսանողական մարմինները: