Հուլիսի 31-ին, ժամը 14.20-ի սահմաններում հրդեհ է բռնկվել Նախիջեւան-Հայաստան սահմանային գոտու խոտածածկ տարածքում, որը սպառնացել է Բարձրունի գյուղի ցորենի դաշտերին:

Հայաստանի ԱԻՆ փրկարար ծառայությունից NEWs.am-ին հայտնում են, որ դեպքի վայր է մեկնել Վայքից մեկ մարտական հաշվարկ, մարզային փրկարարական ջոկատը եւ Եղեգնաձորից երեք եւ Ջերմուկից հինգ հրշեջ-փրկարար: Հրդեհաշիջման աշխատանքներին մասնակցել են նաեւ մոտակա զորամասից 70 զինվոր եւ Բարձրունի գյուղի 20 բնակիչ:

Հրդեհը մեկուսացվել է ժամը 16.25-ին: Այրվել է մոտ 100 հա խոտածածկ տարածք:

Օգոստոսի 1-ին, ժամը 10.24-ին Վայոց ձորի մարզից տեղեկություն է ստացվել, որ Նախիջեւան-Հայաստան սահմանային գոտում` Բարձրունի գյուղին հարակից չեզոք տարածքի ուղեկալում բռնկված խոտի հրդեհի հետեւանքով տեղի է ունեցել ականի պայթյուն: Տուժածներ չկան, անձնակազմը գտնվում է անվտանգ գոտում:

Հրդեհը մարվել է ժամը 23.10-ին: Այրվել է 170 հա արոտավայր: