ՄԱԿ-ի Անվտանգության խորհուրդը հավանություն է տվել ՄԱԿ-ի Գլխավոր քարտուղար Բան Կի Մունի որոշմանը՝ «Ազատության նավատորմի» միջադեպի կապակցությամբ միջազգային անկախ հանձնաժողով ստեղծելու վերաբերյալ: Այդ մասին լրագրողներին հայտնել է ՄԱԿ-ում Ռուսաստանի մշտական ներկայացուցիչ Վիտալի Չուրկինը:
Մեկ օր առաջ Բան Կի Մունը տեղեկացրել էր ՄԱԿ ԱԽ-ին չորս հոգուց բաղկացած հանձնաժողովի ձեւավորման մասին՝ Նոր Զելանդիայի նախկին վարչապետ Ջեֆրի Փալմերի գլխավորությամբ: Նրանում ընդգրկված են մեկական ներկայացուցիչներ Իսրայելից եւ Թուրքիայից, եւ Կոլումբիայի գործող նախագահ Ալվարո Ուրիբեն: Նախատեսվում է, որ իր առաջին զեկույցը հանձնաժողովը կներկայացնի սեպտեմբերի կեսին, հաղորդում է «ՌԻԱ Նովոստին»:
Հիշեցնենք, որ մայիսի 31-ին Իսրայելի հատուկ ուժերը հարձակվել էին «Ազատության նավատորմի» վրա, որը փորձում էր ճեղքել Գազայի հատվածի շրջափակումը: Հարձակման ժամանակ 9 մարդ էր զոհվել: Ավելի վաղ Իսրայելը հրաժարվում էր միջազգային անկախ հանձնաժողով ստեղծել, սակայն օրեր առաջ համաձայնվել է միջազգային հանրության պահանջին: