Ամերիկյան Դելավեր նահանգի Լյուիս քաղաքի բնակիչ Ջեք Բերբերյանը որոշել է իր ներդրումն ունենալ Հայոց ցեղասպանության 100-րդ տարելիցի առիթով անցկացվող միջոցառումներում: Ըստ տեղական «Cape Gazette» պարբերականի հրապարակման, Լյուիսից դեպի հյուսիս գտնվող մայրուղում նրա ձեռնարկության էլեկտրոնային գովազդային վահանակի վրա մեկ ամիս շարունակ «1915: Այլեւս երբեք: Հայոց ցեղասպանություն» գրությունն է եղել:
«Իմ տատիկը վերապրել է ցեղասպանությունը: Այդ իրադարձությունների մասին հիշողությունները մեր մշակույթի մասն են եղել: Ես պետք է այնպես անեի, որպեսզի մենք չմոռանանք մեր պատմությունն ու արմատները»,- ասել է Բերբերյանը:
Գործարարը նաեւ կապվել է նահանգի օրենսդիրների՝ Էռնի Լոպեսի եւ Ներկացուցիչների պալատի խոսնակ Փիթ Շվարցկոփֆի հետ, խնդրելով Հայոց ցեղասպանության ճանաչման մասին բանաձեւի նախագիծ ներկայացնել: Երկուսն էլ համաձայնել են:
Նահանգի օրենսդիր երկու պալատներն էլ նախկինում ճանաչել են Ցեղասպանությունը, բայց՝ տարբեր ժամանակներում. 1995 թվականին՝ Սենատը, 2007-ին՝ Ներկայացուցիչների պալատը: Իսկ ապրիլին ընդունված բանաձեւն առաջինն էր, որը նահանգի օրենսդիր երկու պալատներն էլ հավանության են արժանացրել միաժամանակ:
