Հակառակորդի հետ շփման գծում զինվորական ծառայություն իրականացնող սպաներն ու ենթասպաներն ավելի բարձր թոշակ են ստանալու: Նման որոշման նախագիծ է ներառված Կառավարության հունիսի 4-ի նիստի օրակարգում, որով փոփոխություններ կկատարվեն «Պետական կենսաթոշակների մասին» որոշման մեջ:
Ըստ այդմ, որոշմանը կից հիմնավորման մեջ նշվում է, որ այսուհետ Զինված ուժերի սպայական, ենթասպայական եւ պայմանագրային շարքային կազմի զինծառայողների կենսաթոշակի վճարման չափը նախատեսելուց առաջ հաշվի են առնվելու հակառակորդի հետ շփման գծում մարտական հերթապահության իրականացման ժամանակահատվածը:
«Լրացուցիչ խթանիչ ուժ կհանդիսանա մարտական հերթապահություն իրականացնող զորամասերը սպայական, ենթասպայական եւ պայմանագրային շարքային կազմի զինծառայողներով համալրման գործընթացը արդյունավետ կազմակերպելու համար, որով մեկ անգամ եւս կբարձրանա Հայաստանի Հանրապետության անվտանգությանը, պաշտպանությանը եւ տարածքային ամբողջականությանը, նրա սահմանների անձեռնմխելիությանը ուղղված, ՀՀ օրենսդրությամբ սահմանված, Հայաստանի Հանրապետության զինված ուժերի գործընթացի որակը»,-ասված է հիմնավորման մեջ:
