Հրաչյա Հարությունյանին էքստրադիցիայի ենթարկելու մասով առայժմ համաձայնություն չկա: Այս մասին NEWS.am-ի թղթակցին հայտնեց Արդարադատության նախարար Հովհաննես Մանուկյանը՝ մեկնաբանելով լրատվամիջոցներում տարածված տեղեկությունները:
Նա նշեց, որ այս պահին նման բան չկա: «Ռուսական կողմից դեռ վերջնական պատասխան չենք ստացել, համենայն դեպս՝ այս փուլում փոխանցման վերաբերյալ որոշում չունեն»,-ասաց նախարարը: Հարցին, թե ինչ ժամկետում պարզ կլինի տեղափոխման հարցը, նախարարն ասաց, որ որեւէ ժամկետ չկա, մշտապես կապի մեջ են իրենց ռուս գործընկերների հետ:
Նշենք, որ դատապարտյալը կարող է փոխանցվել միայն հետևյալ պայմանների առկայության դեպքում՝ երբ տվյալ անձը Կատարող պետության քաղաքացի է, դատավճիռը վերջնական է, փոխանցման մասին խնդրանքն ստանալու պահին պատիժը կրելու համար դատապարտյալին մնացել է առնվազն վեց ամիս ժամկետ, կամ պատժի ժամկետն անսահմանափակ է, փոխանցումը համաձայնեցված է դատապարտյալի հետ, կամ երկու Կողմերից որևէ մեկը, ելնելով դատապարտյալի տարիքից, ֆիզիկական կամ հոգեկան վիճակից, անհրաժեշտ է համարում փոխանցումը համաձայնեցնել նրա օրինական ներկայացուցչի հետ եւ այլն:
Հիշեցնենք, որ բեռնատարը, որի ղեկին եղել է Հրաչյա Հարությունյանը, 2013 թվականի հուլիսի 13-ին մխրճվել է Պոդոլսկից դեպի Կուրիլովո 64 ուղեւորի փոխադրող ավտոբուսի մեջ: Վթարի հետեւանքով 18 մարդ զոհվել է, ավելի քան 40-ը՝ վիրավորվել:
Հետաքննության արդյունքում պարզվել է, որ բեռնատարը հարկ եղածի պես չի սպասարկվել, ինչի արդյունքում արգելակման հետ կապված խնդիրներ է ունեցել: Ըստ հետաքննության, Հարությունյանը պետք է իմանար այդ մասին: Մոսկվայի քաղաքային դատարանը Հրաչյա Հարությունյանին դատապարտել է 6 տարի եւ 9 ամիս ժամկետով ազատազրկման: Մոսկվայի քաղաքային դատարանըանփոփոխ է թողել այդ դատավճիռը: