Բաքուն շարունակում է սվիններով դիմավորել իր հասցեին հնչող ցանկացած քննադատություն։
Մեկնաբանելով Պետդեպի հայտարարությունը, որով ԱՄՆ-ը դատապարտել էր Ադրբեջանում ընդդիմադիր Ղանիմեթ Զահիդի եւ Էմին Միլիի հարազատների ձերբակալությունները, Ադրբեջանի ԱԳՆ մամուլի խոսնակ Հիքմեթ Հաջիեւն իր զայրույթն է արտահայտել այդ կապակցությամբ։
«ԱՄՆ Պետդեպարտամենտը համառորեն չի ուզում նկատել Հարավային Կովկասի տարածաշրջանում անհանգստություն առաջ բերող դեպքերը, այդ թվում՝ ցուցարարների դաժան ծեծն ու զանգվածային կալանքները։ Միաժամանակ Պետդեպը «լուրջ մտահոգություն» է հայտնում եւ քաղաքականացնում է կոնկրետ հանցավոր արարքը, ինչը միջամտություն է Ադրբեջանի ներքին գործերին եւ երկակի չափանիշների օրինակ»,- հայտարարել է Հաջիեւը։
Նա քննադատել է եւ հենց ԱՄՆ-ին։ «Այսօր ԱՄՆ-ում ոստիկանական կամայականության ալիք է բարձրացել։ Այդ երկրում ռասիզմի դեպքերն աճում են։ Տխրահռչակ Գուանտանամոյի բանտում կտտանքներն ու երկրի ներսում եւ դաշնակից երկրներում «գլոբալ» գաղտնալսումները, այդ պետությունների ինքնիշխան իրավունքների ոտնահարումները, անօդաչուների իրականացրած սպանությունները, ահա ԱՄՆ իրական դեմքը։ Այս ամենի ֆոնին իրեն «մարդու իրավունքների գլոբալ պաշտպան» ներկայացնելը քամահրանք է առաջ բերում։
