«Ոտքի՛, Հայաստան» շարժումը Սահմանադրական բարեփոխումների դեմ պայքարող՝ «Չե՛ք անցկացնի» նախաձեռնությանը միանալու պաշտոնական որոշում դեռեւս չի կայացրել, սակայն չի բացառում հետագայում նրանց միանալը: Այս մասին NEWS.am-ի թղթակցի հետ զրույցում ասաց շարժման նախաձեռնող խմբի անդամ Դավիթ Սանասարյանը:
«Շատ կերեւոր գործ են անում, ինքս աջակցելու եմ: Չի բացառվում, որ «Ոտքի՛, Հայաստան» շարժումը նույնպես որոշ ժամանակ անց բարձրացնի այդ հարցը: Մենք լինելու ենք այնտեղ, որտեղ «ոչ» է ասվելու սահմանադրական չարեփոխումներին»,- ասաց Դավիթ Սանասարյանը:
Դավիթ Սանասարյանի խոսքով՝ անհրաժեշտ է մասնակցել սահմանադրական բարեփոխումների հանրաքվեին եւ «դեմ» քվեարկել, իսկ այն ընդունվելու դեպքում՝ հավաքվել Ազատության հրապարակում եւ հետընտրական պայքար սկսել: Նա վստահ է. այդ ժամանակ կհավաքվեն ավելի մեծ թվով քաղաքացիներ, քան Բաղրամյան պողոտայում էին:
«Ամեն պայքար իր հետ նոր ուժ ու ալիք է բերելու: Պետք չէ մտածել, որ Բաղրամյանը եղավ, էլ նման բան չի լինելու: Ես վստահ եմ, որ ավելի լավ է լինելու»,- ասաց Դավիթ Սանասարյանը:
Նշենք, որ «Չե՛ք անցկացնի» նախաձեռնությունը սահմանադրական բարեփոխումների դեմ պայքարող բոլոր ուժերին համախմբելու գործընթաց է սկսել: Թե ինչպես են պայքարելու բարեփոխումների դեմ՝ դեռեւս վերջնականապես չի որոշվել: