Հունական պատվիրակությունը՝ Հունաստանի ցամաքային զորքերի գլխավոր շտաբի ղեկավար, գեներալ-լեյտենանտ Ֆրանգոս Ֆրանգուլիսի ղեկավարությամբ, այցելել է Օսմանյան կայսրությունում Հայոց ցեղասպանության զոհերի հուշահամալիր՝ Ծիծեռնակաբերդ: Նա հարգել է Հայոց ցեղասպանության զոհերի հիշատակը եւ ծաղկեպսակ դրել Ծիծեռնակաբերդում, եղել թանգարանում, որտեղ հավաքված են նախորդ դարասկզբին հայերի արյունոտ սպանդի պատմական փաստերը: Թանգարանի ճանապարհին նա իր հիացմունքն է հայտնել Արարատ լեռան տեսարանով: «Հիասքանչ է»,- ասել է նա:
Ֆրանգուլիսին ցուցադրել են թանգարանի ցուցանմուշները, վավերագրական վկայությունները: Գեներալը, որպես զինվորական, առանձնակի ուշադրությամբ ծանոթացել է հայերի ինքնապաշտպանական մարտերի մասին վկայություններին:
Թանգարանի վարչակազմը հույն զինվորականին ալբոմ է նվիրել, որը պատմում է մեկդարյա վաղեմություն ունեցող դեպքերի ամսին:
«Հարկավոր է հարգել ցանկացած ժողովրդի պատմությունը: Ինչպես ասել է Պերիկլեսը «ազատությունը խիզախություն է պահանջում»: Հայ ժողովուրդը, որ նման կորուստներ է ունեցել, կարողացել է անկախության հասնել, ապացուցել է, որ խիզախ է»,- նկատել է Ֆրանգուլիսը:
Նշենք, որ գեներալ-լեյտենանտ Ֆրանգոս Ֆրանգուլիսը Ծիծեռնակաբերդ է այցելում արդեն երկրորդ անգամ: