Երեւանում վերջերս բացված Լոմոնոսովի անվան Մոսկվայի պետական համալսարանում սովորում է 65 ուսանող։ Նրանցից 15-ը՝ պետպատվերով։ Այս մասին սեպտեմբերի 18-ին լրագրողների հետ զրույցում հայտարարեց ՄՊՀ ռեկտոր Վիկտոր Սադովնիչին։
«Սա միայն սկիզբն է, այդ պատճառով մենք հույս ունենք, որ մոտակա տարիներին այստեղ արդեն կուսանի 5 հազար ուսանող։ Ենթակառուցվածքը թույլ է տալիս։ Սակայն մենք բացման եւ համագործակցության մասին համաձայնագիրը նոր ենք ստորագրել, այդ պատճառով առաջին կուրսը հավաքվել է այս մասշտաբով»,- նշեց ռեկտորը։
Նրա խոսքով՝ ուսումնական հաստատությունում ուսուցումը տարվում է 5 ֆակուլտետներում՝ կիրառական մաթեմատիկա եւ ինֆորմատիկա, բանասիրություն, իրավագիտություն, լրագրություն, միջազգային հարաբերություններ։ Բոլոր դասախոսները ժամանելու են Մոսկվայից։
«Այս կիսամյակում կժամանի 50 դասախոս եւ պրոֆեսոր։ Մոտ 10-ն արդեն դասավանդում են։ Իհարկե, դասընթացներին կմասնակցեն նաեւ որոշ տեղական մասնագետներ։ Մասնաճյուղը կօգտագործի նաեւ Հայաստանի ԳԱԱ պոտենցիալը»,- ընդգծեց Սադովնիչին։
Անդրադառնալով ուսման վարձին՝ ռեկտորը նշեց, որ այդ հարցը որոշում է հայկական կողմը։
Մոսկվայի պետական համալսարանի Երեւանի մասնաճյուղի գործադիր տնօրեն Արման Զարգարյանը հայտնեց, որ ուսման վարձը, ֆակուլտետից կախված, տատանվում է 1 մլն 500 հազարից 1 մլն 800 հազարի սահմաններում։ «Հաշվի առնելով մատուցվող կրթության մակարդակը՝ մենք կարծում ենք, որ գինը խելամիտ է եւ նպատակահարմար»,- ասաց նա։
Կրթության եւ գիտության նախարար Արմեն Աշոտյանն իր հերթին նշեց, որ Մոսկվայի հետ բանակցություններ են տարվում եկող տարի ռուսական կողմից պետպատվեր մտցնելու համար։
Նրա խոսքով՝ ընդունվել կարող են բոլոր դիմորդները՝ անկախ քաղաքացիությունից։
Մոսկվայի պետական համալսարանի Երեւանի մասնաճյուղ էր այցելել նաեւ ՀՀ նախագահ Սերժ Սարգսյանը։
