Տարիներ շարունակ Ադրբեջանը, օգտվելով Թուրքիայի աջակցությունից, ջանքեր է գործադրում սեփական «ցեղասպանությունը» հորինելու համար եւ փորձում է միջազգային հանրության առջեւ ներկայանալ որպես զոհ։ Այս մասին սեպտեմբերի 25-ին՝ Ցեղասպանության 100-ամյակի միջոցառումների ծրագրի շրջանակներում իրականացվող «Հիշում եմ եւ պահանջում» փորձագիտական ֆորումի ժամանակ, հայտարարել է ՀՀ փոխարտգործնախարար Շավարշ Քոչարյանը։
«Մենք ցանկանում ենք միջազգային հանրության ուշադրությունն հրավիրել այն բանի վրա, որ դա վարկաբեկում է ցեղասպանությունների կանխարգելմանն ուղղված միջազգային ջանքերը եւ աղավաղում է ցեղասպանություն հասկացությունը։ Առավել եւս, երբ դա անում է այն կողմը, որը 1990-ական թթ. սկզբին փորձում էր բնաջնջման եւ աքսորի ցեղասպան քաղաքականություն իրականացնել Լեռնային Ղարաբաղի բնակչության նկատմամբ, սակայն որը տապալվեց հերոսական պայքարի արդյունքում»,- ընդգծել է Շավարշ Քոչարյանը։
Փոխնախարարի խոսքով՝ ժխտման դեմ մղվող պայքարը այսօր ցեղասպանությունների կանխարգելման գլխավոր բաղադրիչն է։ Քոչարյանի համոզմամբ ժխտման կողմնակիցները, որոնք փորձում են պաշտպանվել եւ արդարացնել իրենց արարքը խոսքի ազատությամբ, օգտագործում են մարդու իրավունքների պաշտպանության Եվրոպական կոնվենցիան։ «Այս պայմաններում Հայաստանի պատկան մարմինները աշխատանք են տանում մարդու իրավունքների պաշտպանության քողի ներքո մարդկության դեմ նոր հանցագործություններ թույլ չտալու համար։ ՀՀ ԱԳՆ-ն հետեւողական աշխատանք է իրականացնում Թուրքիայի ժխտման քաղաքականության քայլերը չեզոքացնելու համար»,- ասել է ՀՀ փոխարտգործնախարարը։
