Եվրասիական տնտեսական հանձնաժողովի Կոլեգիայի անդամ (նախարար) Ռոբերտ Հարությունյանը հոկտեմբերի 2-ին Սոչիում «Սոչի-2015» միջազգային ներդրումային ֆորումի շրջանակներում պատմել է ԵՏՄ երկրների տնտեսությունների աճի վերականգնման հնարավոր ճանապարհների մասին։ Ֆորումին մասնակցել են աշխարհի 40 երկրների պետական մարմինների, գործարար շրջանակների ներկայացուցիչներ։
«ԵՏՄ. ինտեգրացիայի նոր հորիզոններ» թեմայով կլոր սեղան-քննարկման ժամանակ Ռոբերտ Հարությունյանը նշել է, որ ԵՏՄ անդամ երկրների տնտեսությունների աճի տեմպը հնարավոր է վերականգնել ներքին ռեսուրսների, ներքին սպառման հաշվին։ Հիմնական ուղղությունը պետք է լինի տնտեսությունների դիվերսիֆիկացիան, առեւտրային հաշվեկշռի բարելավումը, կշռադատված նորարարական քաղաքականությունը։
«Այդ ուղղությունները պետք է հաշվի առնեն մի շարք գործոններ, որոնք մի կողմից թույլ կտան մեծացնել բնակչության եկամտի մակարդակը եւ սպառողական պահանջարկը, իսկ մյուս կողմից կնպաստեն արտադրության նոր տեսակներում ներդրումների աճին,»,- ասել է ԵՏՀ նախարարը եւ նշել որ գործարարը պետք է վստահ լինի պետության երկարաժամկետ ու կանխատեսելի քաղաքականության մեջ։
