Հայտնի ռոք երգիչ, System of a down խմբի մեներգիչ Սերժ Թանկյանը օգոստոսի 24-ին համերգ է տվել Համբուրգի Altona թաղամասում գտնվող Grosse Freiheit («Մեծ ազատություն») համերգասրահում: Նկատերնք, որ Altona թաղամասում են իրենց կարիերան սկսել The Beatles աշխարհահռչակ խմբի լիվերպուլցի երիտասարդները: Այստեղ են ելույթներ ունեցել 1960-ականների սկզբին ռոքը հիմնադրած այլ աստղեր:
Թանկյանի համերգին եկել են տարբեր տարիքի ու ազգության մարդիկ. գերմանացիներ, հույներ, ռուսներ, ամերիկացիներ եւ, իհարկե, հայեր:
Ինչպես եւ Երեւանում, Համբուրգում եւս Սերժ Թանկյանի համերգը բացել է Visa խումբը, որի երգերում նկատելի է հունական, հայկական, միջերկրական, գնչուական, լատինական եւ բալկանյան մեղեդիների ազդեցությունը: Visa-ի համերգին հաջորդած կարճատեւ ընդմիջման ընթացքում դահլիճը անվերջ վանկարկում էր` «Սե'րժ, Սե'րժ, Սե'րժ»:
Թանկյանին իր խմբից բացի նվագակցում էին նաեւ Չեխիայի պետական սիմֆոնիկ նվագախմբի 8 երաժիշտներ:
Ինչպես միշտ, այս համերգին եւս Թանկյանը խիստ քննադատական խոսքեր է հնչեցրել ԱՄՆ-ի, Եվրոպայի ու երկրների կառավարությունների հասցեին` նրանց մեղադրելով պատերազմների, բռնությունների եւ անարդարությունների համար:
Մեր հայրենակիցը այս համերգին կատարել է ցեղասպանությանը նվիրված իր երգը, նշելով. «Սա հայերեն երբեւէ գրած իմ առաջին երգն է, երգի անունն է «Այո, դա ցեղասպանություն էր»: Նա հյուրախաղերով հադես է եկել ողջ Եվրոպայով եւ ամենուր կատարել է այս երգը, որը տեղ կգտնի սեպտեմբերի 21-ին թողարկվելիք Imperfect Harmonies սկավառակում:
Նշենք, որ Սերժ Թանկյանն իր հիմնադրած System of a Down խմբի երաժիշտներից զատ համագործակցել է նաեւ իր պես անկախ եւ ապստամբ ստեղծագործողների` Արտո Թունջբոյաջյանի, Black Sabbath-ի համահիմնադիր եւ կիթառահար Թոմի Այոմիի, Nirvana եւ Foo Fighters խմբից Դեյվ Գրոլի, Rage Against the Machine խմբից Թոմ Մորելոյի եւ բազմաթիվ բացառիկ այլ երգահանների հետ: Հաղորդում է «Ազատություն» ռադիոկայանը: